Къэралыгъо фэIо-фашIэхэм я ЗыкI портал едзыгъуакIэу «Госуслуги Авто» зыфиIорэр шэкIогъум и 10-м къихьагъ. Ащ къыдыхэлъытагъэу джы водительскэ удостоверениехэр электроннэ шIыкIэм тетэу Къэралыгъо автоинспекцием икъулыкъушIэхэм ябгъэлъэгъун амал щыIэ хъугъэ. Ау тхьапэм тетхэгъэ удостоверение къызэрыкIори зыдэпIыгъын зэрэфаер гъогурыкIоным ишапхъэхэм ахагъэкIыгъэп.
Шъугу къэдгъэкIыжьын мыщ ыпэкIэ транспорт амалыр тхыгъэным исвидетельствэ (СТС) мы едзыгъом иIэпыIэгъукIэ электроннэ шIыкIэм тетэу агъэфедэ зэрэхъугъэр. А амалыр ушэтыпIэу зыщытыр илъэситIу хъущт ыкIи шIуагъэ къытэу алъытагъ. Ащ диштэу джы водительскэ удостоверениехэр а шIыкIэмкIэ ауплъэкIухэу рагъэжьагъ.
Электроннэ СТС-р ябгъэлъэгъуным пае едзыгъоу «Госуслуги Авто» зыфиIорэм уихьэмэ, цIыфым тетхэгъэ машинэхэр зэкIэ къыхеутых. Ащ ычIэгъ кнопкэу «къэгъэлъагъу документхэр» зыфиIорэр чIэт. УзытеIункIэкIэ QR-кодыр экраным къытехьащт, инспекторым ипланшеткIэ ащ къеджэн ылъэкIыщт.
Водительскэ удостоверениер электроннэ шIыкIэм тетэу ябгъэлъэгъуным фэшI джащ фэдэу узекIощт. Едзыгъоу «Водительские права» зыфиIорэм ухэхьанышъ, кнопкэу «Предъявить права» зыфиIорэм утеIункIэщт. Нэужым QR-кодыр къытыредзэ, машинэр зезыфэрэм епхыгъэ къэбарыр зэкIэ (исурэт хэтыжьэу) инспекторым ылъэгъущт.
СистемакIэр чъэпыогъум аушэтэу аублагъ, шэкIогъум къыщегъэжьагъэу зэкIэми агъэфедэшъунэу хъугъэ. Къыхэгъэщыгъэн фае, едзыгъоу «Госуслуги Авто» зыфиIорэр мыщ ыпэкIэ зиIагъэхэм агъэфедэжьышъущтэп, ар тырагъэкIыжьынышъ, икIэрыкIэу тыратхэжьын фае. Сыда пIомэ, ар автомат шIыкIэм тетэу, гъэкIэжьыгъэ хъурэп.
Мы Iофыр пхырыщыгъэ зэрэхъурэм тыкIэупчIагъ. ГъогурыкIоныр щынэгъончъэнымкIэ къэралыгъо автоинспекцием и ГъэIорышIапIэу АР-м щыIэм ипащэ игуадзэу, полицием иполковникэу Едыдж Мурат къызэриIуагъэмкIэ, гъогурыкIоным ишапхъэхэм афэгъэхьыгъэу къежьэрэ федеральнэ зэхъокIыныгъакIэхэм шъолъыр инспекцием илIыкIохэр щыгъуазэх ыкIи ахэр зэрэпхыращыщтхэм анаIэ тырагъэты.
— Водительскэ удостоверениехэр электроннэ шIыкIэм тетэу машинэр зезыфэхэрэм къагъэлъэгъон амал щыIэ зэрэхъугъэм тыщыгъуаз, — къеIуатэ инспектор шъхьаIэм игуадзэ. — Гъогум къулыкъур щызыхьыхэрэми ар къафэтэIуатэ, агурэтэгъаIо. Транспорт амалыр тхыгъэным исвидетельствэ электроннэ шIыкIэм зытехьэм, тиIофышIэхэм планшетхэр яIэ хъугъэ. Мыщ джы гумэкIыгъо къыхэкIынэу щытэп, машинэ зезыфэхэрэм электроннэ шIыкIэр республикэм щагъэфедэн алъэкIыщт. Ау, ащ къикIырэп тхьапэм тетхэгъэ удостоверениер амыIыгъыныр.
Мыщ дэжьым упчIэ къэуцу, сыда ащыгъум электроннэ удостоверениер зэрящыкIагъэр? Цифрэ шIыкIэм зэкIэ зэрэтыращэхэрэм пая? КъызэраIуагъэмкIэ, амалыкIэм ишIуагъэ ушэтыным къыгъэлъэгъощт. Ар дэгъоу залъытэкIэ, гъогурыкIоным ишапхъэхэм зэхъокIыныгъэхэр афашIынхэшъ, водительхэм тхьапэм тетхэгъэ документыр аIыгъыныр ищыкIэгъэжьыщтэп.
Iэшъынэ Сусан.