Мы мафэхэм къэралыгъо медицинэ педиатрическэ университетэу Санкт-Петербург дэтым иэкспертхэм Адыгеим Iоф щашIагъ.
Тишъолъыр ит медицинэ учреждениехэм кIэлэцIыкIухэм IэпыIэгъоу арагъэгъотырэр зэрэзэхащагъэм уасэ къыфашIынэу ахэр къеблэгъагъэх. Ащ фэгъэхьыгъэ пресс-зэIукIэ Мыекъопэ къэлэ клиническэ сымэджэщым иперинатальнэ гупчэ щыкIуагъ.
Журналистхэм яупчIэхэм джэуапхэр къаритыжьыгъ лIыкIо купым ипащэу, ыпшъэкIэ зыцIэ къетIогъэ университетым иректорэу, УФ-м инеонатолог шъхьаIэу, медицинэ шIэныгъэхэмкIэ докторэу, профессорэу Дмитрий Ивановым.
— ТилIыкIо куп шъолъыр зэфэшъхьафхэр къекIухьэх, — къеIуатэ Д. Ивановым. —
Анахь пшъэрылъ шъхьаIэу тиIэр кIэлэцIыкIоу къэхъухэрэм япчъагъэ хэгъэхъогъэныр, сабый къэхъугъакIэу зидунай зыхъожьхэрэм япчъагъэ нахь макIэ шIыгъэныр, медицинэм иIофышIэхэм анахьэу анаIэ зытырагъэтын фэе лъэныкъо-
хэр гъэнэфэгъэнхэр ары.
Профессорым зэрэхигъэунэфыкIыгъэмкIэ, УФ-м и Президент пшъэрылъ къыгъэуцугъ 2024-рэ илъэсым ехъулIэу сабый къэхъугъакIэу зидунай зыхъожьыхэрэм япчъагъэ нахь макIэ шIыгъэн фаеу.
Джащ фэдэу УФ-м инеонатолог шъхьаIэ АР-м иперинатальнэ гупчэ иIофшIэн осэшIу къыфишIыгъ.
— Мы гупчэр ящэнэрэ лъэгапIэ зиIэ учреждениеу щыт ыкIи дэгъоу Iоф ешIэ, — къыIуагъ Дмитрий Ивановым. —Бзылъфыгъэ лъэрмыхьэхэм, анахьэу щынагъо зышъхьарытхэм, хьылъэу къэхъугъэ сабыйхэм зэрафэлъэкIэу щалъэплъэх.
Санкт-Петербург ипедиатрическэ университет истационар кIэлэцIыкIу мин 35-мэ щяIазэх. Операцие хьылъэхэу гум, шъхьэкуцIым арашIылIэхэрэр Адыгеим икIэлэцIыкIухэу зищыкIагъэхэм ыпкIэ хэмылъэу арагъэгъотын зэралъэкIыщтыр къэкIогъэ экспертхэм къыхагъэщыгъ.
АР-м псауныгъэр къэухъумэгъэнымкIэ иминистрэ игуадзэу Максим Коробко къызэриIуагъэмкIэ, 2019-рэ илъэсым сабый 13-мэ ядунай ахъожьыгъ, блэкIыгъэ илъэсым а пчъагъэр 23-м нэсыгъ, 2022-р джыри икIыгъэп, ау мы уахътэм ехъулIэу ащ фэдэ хъугъэ-шIэгъэ 19 атхыгъ.
Iэшъынэ Сусан.