Адыгэ Республикэм и Къэралыгъо филармоние икIэлэцIыкIу театрэу «Дышъэ къошыным» икъэгъэлъэгъонхэр гъэшIэгъонэу зэхащэх.
Пшысэхэм яхьылIэгъэ къэшIыгъохэр кIэлэцIыкIухэм лъэшэу агу рехьых.
Михаил Супониным ипшысэу «Вредный заяц» зыфиIорэм техыгъэ кIэлэцIыкIу къэгъэлъэгъоныр режиссерэу Нэгъой Асыет ыгъэуцугъ. ТхьакIумкIыхьэр бжьэм, мышъэм, фэшъхьафхэм апэуцужьы, иягъэ къызэригъэкIощтым пылъ. Арэу щытми, шIушIагъэу щыIэр ем зэрэтекIорэр пшысэм игъэкIотыгъэу къыщэлъагъо.
Адыгэ Республикэм изаслуженнэ артисткэу Къапэ Саидэ, артистхэу ТIэшъу Светланэрэ Сергей Вегеринымрэ ярольхэр къашIыхэзэ, залым чIэс кIэлэцIыкIухэм, ны-тыхэм гущыIэгъу къафэхъух.
Сергей Вегериным ымакъэ ымыIэтэу, пшысэр хъугъэ-шIагъэм фигъадэзэ кIэлэцIыкIухэм къафиIуатэрэм узыIэпещэ. Зэфагъэ пхэлъыным имэхьанэ къызэIуехы. Къапэ Саиди, ТIэшъу Светлани кIэлэцIыкIухэм псынкIэу агурыIуагъэх. Къэгъагъэхэр, нэмыкI пкъыгъохэр сабыйхэм аратызэ агъэуджых, агъэгушIох, ны-тыхэр пчэгум къырагъэблагъэх, къагъашъох. СурэтышI-гъэуцукIоу Альбина Дзарахоховам, артистхэу нысхъапэхэр къэзыгъэлъагъохэрэм яшIушIагъэ кIэлэцIыкIухэм алъэгъугъ, Iэгу афытеуагъэх.
Нысхъапэхэм ятеатрэу «Дышъэ къошыным» ихудожественнэ пащэу, Адыгэ Республикэм инароднэ артистэу Сихъу Станислав ИлъэсыкIэм фэгъэхьыгъэ къэгъэлъэгъонхэр филармони— ем зэрэщыкIощтхэм тащигъэгъозагъ.