Ным и Мафэ ипэгъокIэу

Урысые Федерацием и Президент и Указэу 1998-рэ илъэсым къыдэкIыгъэм тегъэпсыхьагъэу ным и Мафэ аухэсыгъ. ШэкIогъум иаужырэ тхьаумафэ къэс ар ха­гъэунэфыкIы. Мы мафэм ехъулIэу республикэм и Къэралыгъо филармоние мэфэкI Iофтхьабзэр щы­кIуагъ.

Ным и МафэкIэ бзылъфыгъэхэм афэгушIонэу къэкIуагъ Адыгэ Респуб­ликэм и ЛIышъхьэу КъумпIыл Мурат. Iоф­тхьабзэм хэлэжьагъэх хабзэм ифе­деральнэ ыкIи ирес­публикэ къулыкъу­хэм япащэхэр, муниципальнэ образованиехэм ыкIи общественнэ организациехэм ялIыкIохэр.

КъекIолIагъэхэм закъыфигъазэзэ республикэм и ЛIы­шъхьэ къызэриIуагъэмкIэ, ным и Мафэ анахьышIоу ыкIи анахь дахэу щыIэныгъэм хэлъыр зэкIэ епхыгъэу щыт, хэтрэ цIыфи анахь илъэпIэ ным ар фэгъэхьыгъ.

«Нэу ущытыныр псынкIагъоп, гуетыныгъэшхуи, псэемыблэжьныгъи, гуфэбэныгъи ащ ищыкIагъ. Унагъом ныр ары кIэ­гъэкъонышхоу иIэр ыкIи кIэлэцIыкIухэм янасыпыр. Арышъ, нымрэ кIэлэцIыкIухэмрэ Iэпы­Iэгъу ятыгъэнымкIэ Iофтхьа­бзэхэм зягъэушъомбгъугъэным, къэхъухэрэм япчъагъэ нахьыбэ шIыгъэным, унагъом шъхьэ­кIафэу фашIырэм зыкъегъэIэтыгъэным яIофыгъохэр арых Адыгеим щызэрахьэрэ социальнэ политикэм илъэныкъо шъхьа­Iэхэр», — къыхигъэщыгъ Къум­пIыл Мурат.

Ныхэмрэ сабыйхэр зэрыс унагъохэмрэ IэпыIэгъу ятыгъэным тегъэпсыхьэгъэ Iофтхьэбзэ зэфэшъхьафхэу Адыгеим щагъэцакIэхэрэм афэгъэхьыгъэу республикэм и ЛIышъхьэ къыIотагъ. Анахьэу анаIэ зы­тырагъэтырэр сабыибэ зэрыс унагъохэр ары. Урысые Федерацием и Президентэу Владимир Путиным мырэущтэу къы­Iогъагъ: «Тиобществэ унэгъо Iужъухэр щагъэлъапIэх, къэралыгъом ахэм ишIуагъэ аригъэкIыныр иапшъэрэ пшъэ­рылъхэм ахелъытэ».

Мы лъэхъаным сабыибэ зэ­рыс унэгъо 7865-рэ республикэм ис, унэгъо 5024-мэ социальнэ IэпыIэгъу араты. Апэрэ сабыир къызыхъукIэ, мазэ къэс ахъщэ зэратырэ унагъохэр 4690-рэ зэрэхъухэрэр. Ящэнэрэ са­быир е ащ къыкIэлъыкIохэрэр къызыхъухэкIэ, урыпсэунымкIэ анахь ахъщэ макIэу агъэнэфагъэм фэдиз мазэ къэс уна­гъохэм араты.

Ащ нэмыкIэу ящэнэрэ е ащ къыкIэлъыкIорэ кIэлэцIыкIухэр унагъом къызихъухьэхэкIэ, зэтыгъо ахъщэ IэпыIэгъу ятыгъэным ифитыныгъэ унагъохэм яIэ мэхъу. Джащ фэдэу ыпкIэ хэмылъэу яунаеу чIыгу Iахь араты. Лъэпкъ проектэу «Демо­графием» тегъэпсыхьагъэу кIэлэцIыкIухэр зиIэ унагъохэм фэ­гъэ­кIотэныгъэ зыхэлъ чIы­фэ­хэр аратых урысые чIыфэт ор­ганизациехэм ыкIи Iахьзэ-хэлъ обществэу «ДОМ.РФ» зыфиIорэм.

Республикэ бюджетым къыхагъэкIызэ сабыибэ зэрыс уна­гъохэм коммунальнэ фэIо-фа­шIэ­хэм ятын процент 30 къафыщагъакIэ, кIэлэеджакIохэр ыпкIэ хэмылъэу транспортым-
кIэ еджапIэхэм, сэнэхьат зыщарагъэгъотырэ заведениехэм анэсынхэ фитых. КIэлэцIыкIу-хэм япсауныгъэ игъэпытэн программэ гъэнэфагъэм тетэу макIо. Мы илъэсым сабый 22492-мэ загъэпсэфын ыкIи япсауныгъэ агъэпытэн амал аратыгъагъ.

«Тэ пшъэрылъэу тиIэр федеральнэ гупчэм къытырэ амалхэр зэкIэ дгъэфедэнхэр, нымрэ кIэлэцIыкIухэмрэ IэпыIэгъу ятыгъэнымкIэ социальнэ программэ ыкIи проект пстэури щыIэныгъэм гъэцэкIагъэ щыхъунхэр ары», — къыIуагъ Адыгеим и ЛIышъхьэ.

Сабыитф ыкIи ащ нахьыбэ зыпIугъэ бзылъфыгъи 10-мэ Iофтхьабзэм илъэхъан Адыгеим и ЛIышъхьэ аритыжьыгъ дипломэу «Материнская слава» зыфиIорэмрэ Адыгэ Респуб­ликэм ыцIэкIэ шIухьафтынхэмрэ. Ахэр зыфагъэшъошагъэхэр: Хъут Нуриет, Блэгъожъ Сар, Светлана Гершоковар, Езыгу Рим, Галина Калюжнаяр, Татьяна Молчановар, Марина Дереберинар, Кристина Кочневар, Елизавета Шишкинар, ЖэнэлI Марие. Джащ фэдэу зэкIэми аратыгъэх Адыгеим къэралыгъо гъэпсыкIэ иIэ зы­хъугъэм ия 100-рэ илъэс фэ­гъэхьыгъэ нэпэеплъ медальхэр.

Iофтхьабзэм ыкIэм искусст­вэм иIэпэIасэхэм концерт къатыгъ.

АР-м и ЛIышъхьэ ипресс-къулыкъу
Сурэтыр А. Гусевым тыри­хыгъ.