Медицинэм иIофышIэхэм социальнэ найм шIыкIэмрэ ипотечнэ кредитымрэ агъэфедэзэ псэупIэ ягъэгъотыгъэным Адыгеим зыщырагъэушъомбгъугъ. Ащ пае шъолъыр хэбзэгъэуцугъэу фэгъэкIотыныгъэ зиIэ ипотекэр медицинэм иIофышIэхэм ятыгъэным фытегъэпсыхьагъэм зэхъокIыныгъэхэр фашIыгъэх.
— Хэбзэгъэуцугъэу щыIэм елъытыгъэу псэупIэ ипотечнэ кредитыр къаратыным пае апэрэ взносым щыщ процент 15-м икъегъэгъэзэжьын ары зэхъокIыныгъэхэм ащыщхэр зыфэгъэхьыгъагъэхэр, ау ар сомэ мин 250-м нахьыбэн ылъэкIыщтэп. Джащ фэдэу медицинэм иIофышIэхэу ипотечнэ кредитыр зыгъэфедэн зылъэкIыщтхэм япчъагъэ хагъэхъуагъ, — къыщаIуагъ АР-м и Къэралыгъо Совет — Хасэм.
«Медицинэм иIофышIэхэу категорие шъхьаф зиIэхэм социальнэ наймымкIэ псэупIэ ягъэгъотыгъэным ыкIи ахэр унае шIыжьыгъэнхэм пылъ Iофыгъохэр» зыфиIоу министрэхэм я Кабинет къахилъхьагъэм депутатмэ дырагъэштагъ. Апэрэ звеном хэхьэрэ медицинэ IофышIэхэр, IэпыIэгъу псынкIэм икъулыкъу щылажьэхэрэр ары ащ зигугъу къышIыхэрэр, социальнэ найм шIыкIэкIэ унэ зэратыгъэмэ илъэси 10-м загъэфедэрэ ужым ахэр унае ашIыжьынхэмкIэ фитыныгъэ яIэнэу хэбзэгъэуцугъэм къыделъытэ.
Псауныгъэр къэухъумэгъэнымкIэ АР-м иминистрэу Мэрэтыкъо Рустем къызэриIуагъэмкIэ, мы хэбзэгъэуцугъэр гъэцэкIэгъэнымкIэ республикэм псэупIэ фонд иIэ хъугъэ, ащ елъытыгъэу, шапхъэу къагъэнэфагъэмэ аблэмыкIхэу псэупIэхэр зытефэхэрэмэ аратынхэ алъэкIыщт. Ащ джащ фэдэу хигъэунэфыкIыгъ мы Iофыгъор Урысые Федерацием и Президентэу Владимир Путиным пшъэрылъэу шъолъыр пащэмэ къафишIыгъэм епхыгъэу къызэраIэтыгъэр ыкIи Iоф зэрэдашIэрэр.