2022-рэ илъэсыр, Адыгеим къэралыгъо гъэпсыкIэ зигъотыгъэр илъэси 100 зыщыхъугъэр, мэфэкI зэфэшъхьафхэу лъэпкъымкIэ мэхьанэ зиIэхэмкIэ бай.
Тарихъ мэфэкI иным ихэгъэунэфыкIын илъэсым къыкIоцI чанэу хэлэжьагъ ыкIи хэлажьэ Адыгэ республикэ кIэлэцIыкIу тхылъеджапIэр. ИкIэлэеджэкIо чанхэм апае ащ Iофтхьэбзэ гъэшIэгъоныбэ зэхищагъ. Ахэр зэкIэ пIуныгъэ-гъэсэныгъэр гъэпытэгъэным, шIэныгъэм уасэу иIэр лIэужыкIэм гурыгъэIогъэным ыкIи щыIэныгъэм къыгъэуцурэ упчIабэмэ алъыIэсэу, ахэм джэуап афагъотэу егъэсэгъэнхэм фэшIушIэ, кIэлэцIыкIу тхылъеджапIэм иIофышIэхэм пшъэрылъ инэу зэшIуахыхэрэм ащыщ.
Адыгэ республикэ кIэлэцIыкIу тхылъеджапIэм идиректор игуадзэу Даур Саидэ къызэриIуагъэмкIэ, 2022-рэ илъэсыр къызихьагъэм щегъэжьагъэу мы бжыхьэ мазэхэм къанэсыжьэу мэфэкI иным фэгъэхьыгъэу ашIагъэр макIэп. ТхылъеджапIэм ифойе тхылъ къэгъэлъэгъонэу «Живи и процветай, моя Адыгея!» зыфиIоу республикэм тарихъ лъапсэр зэридзыгъэр къизыIотыкIырэ тхылъхэр зыхэлъыр, лъэпкъым ицIыф пэрытхэр, ичIыопс хьалэмэт, икультурэ ыкIи ишэн-хабзэхэр къызщыIотагъэхэр ащ зэрэщыгъэфедагъэхэр, илъэс реным ар агъэкIэжьызэ къызэрагъэлъагъорэр Саидэ къыIуагъ.
Адыгеим къэралыгъо гъэпсыкIэ зигъотыгъэр илъэси 100 зыщыхъурэм ехъулIэу мэкъуогъум адыгэ литературэмрэ библиографиемрэкIэ отделым мэфэкI къиIотыкIын «Выдающийся сын Адыгеи» ыIоу, Адыгэ автоном хэкум иапэрэ Iэшъхьэтетыгъэу Хьахъурэтэ Шыхьанчэрые фэгъэхьыгъэу зэхищэгъагъ. Ащ тхылъеджэ чанхэр ыкIи лицееу N 19-м игъэмэфэ лагерь зыщызгъэпсэфырэ еджакIохэр хагъэлэжьагъэх. Хьахъурэтэ Шыхьанчэрые ищыIакIэ, иеджакIэ, адыгэ лъэпкъым псэукIэ тынч фыхэхыгъэныр зыфызэшIокIыгъэу, большевикэу Ш. У. Хьахъуратэр зэрэщытыгъэр мы IофтхьабзэмкIэ афыраIотыкIыгъ. Адыгэ автоном хэкур зэрагъэпсыгъэм фэгъэхьыгъэ электроннэ лъэтегъэуцор яIагъ.
Бэдзэогъум и 27-м, Адыгэ автономыр зызэхащагъэр илъэси 100 зыхъугъэм, республикэ кIэлэцIыкIу тхылъеджапIэм литературнэ-музыкальнэ композициеу «До чего же он хорош, край, в котором ты живешь!» зыфиIорэр щыкIуагъ. Ащ кIэлэцIыкIу гъэсэпIэ гупчэу «Смайлик» зыцIэм къикIыгъэхэр хэлэжьагъэх. МэфэкI видеолъэтегъэуцоу «Адыгееу — гум икIэсэ хэкур» зыфиIорэр къафагъэлъэгъуагъ. Ащ ыуж Адыгэ автоном хэкур зэрагъэпсыгъэр ыкIи Адыгеим икъэралыгъо тамыгъэхэу гербыр, быракъыр, гимныр зэрэщытхэр къафаIотагъ, тамыгъэ пэпчъ имэхьанэ къыщыуцугъэх.
МэфэкI Iофтхьабзэм хэлэжьэрэ кIэлэцIыкIухэр адыгэ джэгукIэхэу «НэшъуупIыцI», «ПэIочIалъхь», «Лъэкъо зэкъо пкIэн» зыфиIохэрэмкIэ агъэджэгугъэх.
Iоныгъом и 2-р Мыекъуапэ имэфагъ. «Город в долине яблонь» зыфиIорэ краеведческэ сыхьатыр ащ тегъэпсыхьэгъагъ. ЛIэужыкIэм къалэм итарихъи, инепэрэ щыIакIи, икъэкIощт зыфэдэщтэу алъытэрэри къафыраIотыкIыгъ. КIэлэеджэкIо Iушхэр ягуапэу викторинэм хэлэжьагъэх, анахь сэнаущхэм ашIэрэр зэрэбэр мэфэкIым къыщылъэгъуагъ.
Iоныгъом и 28-р — адыгэ шъуашэм и Мафэ Адыгеим игъэкIотыгъэу щыхагъэунэфыкIы. Ар ини цIыкIуи зэфэдэу анахь якIэсэ мэфэкIхэм ащыщ. КIэлэцIыкIухэми ахэтых адыгэ къашъохэр къэзышIхэу, ахэм зафэзыгъасэхэрэр, адыгэ лъэпкъ шъуашэри зыщалъэ. Мы мэфэкI сыхьатым еджакIохэри, кIэлэцIыкIу IыгъыпIэм къыращыгъэхэри хэлэжьагъэх «Лъэпкъ шъуашэр — силъэпкъ ынап, икIэн» зыфиIорэ къиIотыкIыныр лъэшэу гъэшIэгъоныгъ. Адыгэ шъуашэм и Мафэ щыIэ зэрэхъугъэр, адыгэ шъуашэхэр зэрэзэтекIыхэрэр — бзылъфыгъэ ыкIи хъулъфыгъэ шъуашэхэр зыфэдэхэр, адыгэ шъуашэр зызыщыплъэкIэ ащ узэригъэбжьышIорэр, пкъыр нахь хэпIэтыкIэу узэрэзыфигъэсакъыжьырэр къафаIотагъ. Фидеофильмэу шъуашэмкIэ IэпэIасэу СтIашъу Юрэ фэгъэхьыгъэм щыщ рагъэплъыгъэх. КIэлэцIыкIухэмкIэ гум нахь къинэжьэу щытыгъэр ежьхэр адыгэ шъуашэр ащыгъэу къызэрэшъуагъэхэр, хэгъэгум, хэкум, республикэм яхьылIэгъэ усэхэр ыкIи орэдхэр къызэраIуагъэхэр ары.
Даур Саидэ анахь къыхигъэщыгъэр мэфэкI Iофтхьабзэ пэпчъ гъэсэныгъэ-пIуныгъэ мэхьэнэ куу иIэу, къыткIэхъухьэрэ кIэлэцIыкIухэм ядунэелъэгъукIэ, ядунэееплъыкIэ агъэбаеу зэрэщытыгъэр ары.