Республикэм исхэу мобилизацием къыхиубытагъэхэм, хэушъхьафыкIыгъэ дзэ операциер зыщыкIорэ чIыпIэм щыIэ тичIыпIэгъухэм ящыкIэгъэ IэпыIэгъур ягъэгъотыгъэнымкIэ Адыгеим Iофхэр щылъагъэкIуатэх.
Адыгеим и ЛIышъхьэ пшъэрылъ зэрафишIыгъэм тетэу АР-м и Къэралыгъо Совет — Хасэм и Тхьаматэ, идепутатхэм, АР-м и ЛIышъхьэрэ АР-м иминистрэхэм я Кабинетрэ я Администрацие ипащэ, илIыкIохэм, IофышIэ купхэм язэхэсыгъо муниципалитетхэм ащызэхащэх.
Республикэм иведомствэхэмрэ ипсэупIэхэмрэ япащэхэм бизнесменхэм адыряIэ зэIукIэхэм мобилизацием къыхиубытагъэхэм закъызэрафагъэзэрэ тхылъ пэпчъ икъоу ащызэхафы.
ХэушъхьафыкIыгъэ дзэ операцием хэлажьэхэрэм яунагъохэм социальнэ IэпыIэгъу ягъэгъотыгъэнымкIэ, зэтыгъо ахъщэ IэпыIэгъу аIэкIэгъэхьэгъэнымкIэ ищыкIэгъэ амалхэр республикэм щызэрахьагъэх. Социальнэ газификацием ипрограммэ диштэу дзэ къулыкъушIэхэм яунагъохэр субсидие зэратыщтхэу фэгъэкIотэныгъэ зиIэхэм ахагъэхьагъэх. Дзэ къулыкъушIэхэм якIэлэцIыкIухэм зэтыгъо ахъщэ IэпыIэгъу аIэкIэгъэхьэгъэным епхыгъэ Iофыгъоми дэлажьэх.
Партиеу «Единэ Россиемрэ» республикэ штабэу «МыВместе» зыфиIорэмрэ кIэщакIо зэрэфэхъугъэхэм тетэу хэушъхьафыкIыгъэ дзэ операциер зыщыкIорэ чIыпIэми, Херсон хэкумкIэ Геническэ районми гъомылапхъэхэр, рациехэр, щыгъын фабэхэр, автомобиль щэрэхъ хьашъохэр ыкIи нэмыкI пкъыгъохэр зыхэхьэрэ шIушIэ IэпыIэгъур аIэкIагъахьэ.
«ХэзгъэунэфыкIы сшIоигъу Адыгэ Республикэм и Къэралыгъо Совет — Хасэм идепутатхэм яшIуагъэкIэ хэушъхьафыкIыгъэ дзэ операцием хэлажьэхэрэм транспорт хэбзэ-Iахь амытыным ехьылIэгъэ закон республикэм зэрэщаштагъэр. Анахь пшъэрылъ шъхьаIэхэм ащыщ дзэ къулыкъушIэхэмрэ ахэм яунагъохэмрэ яIофыгъохэр псынкIэу зэшIохыгъэнхэр. Ти Хэгъэгу къэзыухъумэхэрэм лъэныкъо пстэумкIи IэпыIэгъу ягъэгъотыгъэным непэ мэхьанэшхо иI!» — къаритхагъ Адыгеим и ЛIышъхьэ социальнэ хъытыухэм.