Урысыем ирекорди 6 ыгъэуцугъ

Урысыем иныбжьыкIэхэм атлетикэ онтэгъу­мкIэ язэнэкъокъу къалэу Тулэ щыкIуагъ.

Илъэс 18-м ыкIи илъэс 20-м нэс зыныбжьхэр куп зэфэ­шъхьафхэм ахэтхэу зэнэкъо­къугъэх. Адыгэ Республикэм атлетикэ онтэгъумкIэ испорт еджапIэу Чыржьын Мухьар-
бый ыцIэ зыхьырэм зыщызы­гъэсэрэ Артем Горловым дышъэ медалыр къыдихыгъ, Урысыем ирекорди 6 ыгъэуцугъ.

А. Горловыр илъэс 20-м нэс зыныбжьхэм янэкъокъугъ, кг 89-м нэс къэзыщэчыхэрэм якуп иIэпэIэсэныгъэ къыщигъэлъэгъуагъ. ШIыкIэхэу рывокым ыкIи толчокым апэрэ чIыпIэхэр къащи­хьыгъ. ТIоштэгъукIэ къыIэтыгъэ щылычыр къызалъытэжьым, Уры­сыем ирекорди 6 ыгъэуцугъ, апэрэ чIыпIэр къыфагъэшъошагъ.

Урысыем идышъэ медали 3 къыдэзыхыгъэ Артем Горловым псэупIэу Инэм зыщигъасэзэ, спортышхом хэщагъэ хъугъэ, тре­нерэу Роман Казаковыр ипащ. Батырыр Адыгэ къэралыгъо университетым и Мыекъопэ къэралыгъо гуманитарнэ-техническэ колледж щеджэ.

Илъэс 18-м нэс зыныбжь кIалэхэм язэIукIэгъухэм Дмитрий Шмариным, кг 89-рэ, рывокым дышъэ медалыр къыщихьыгъ. Толчокым ятIонэрэ чIыпIэр къыщыдихыгъ. ТIоштэгъум тыжьыныр къыщыфагъэшъошагъ. Батырыр тренерэу, спортымкIэ дунэе класс зиIэ мастерэу Сихъу Рэмэзан егъасэ.

Джамбэчые щапIугъэ ЩашIэ Рустам, кг 73-рэ, толчокым ятIонэрэ чIыпIэр къыщихьыгъ, тIоштэгъу зэнэкъокъум джэрзыр къыщыдихыгъ, тренерыр спортымкIэ дунэе класс зиIэ мастерэу Сихъу Аслъан. Д. Шмариныр, Р. ЩашIэр Адыгэ къэралыгъо университетым иколледж щеджэх.

— Урысыем изэнэкъокъу тиныбжьыкIэхэм къыщыдахыгъэ ме­дальхэм, Артем Горловым ыгъэуцугъэ рекордхэм тагъэгу­шхуагъ, — къытиIуагъ Адыгэ къэралыгъо университетым и Мыекъопэ къэралыгъо гума­нитарнэ-техническэ колледж ипащэу, Урысые Федерацием фи­зическэ культурэмкIэ иза­слу­женнэ IофышIэу Бгъуашэ Айдэмыр. — ТиныбжьыкIэхэм яIэпэ­Iэсэныгъэ спортым щыха­гъэхъоным, щыIэныгъэм щылъыкIотэнхэм тапэкIи тишъыпкъэу тыпы­лъыщт.

— Спортсменхэм, тренерхэм къалэу Тулэ гъэхъагъэу щашIыгъэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фагъэхьы. Лъэшэу тафэраз зэнэкъокъум тыхэлэ­жьэнымкIэ IэпыIэгъу къытфэхъугъэхэм, къытфэгумэкIыгъэхэм, телефонкIэ къытфытеуагъэ­хэм, — къытиIуагъ АР-м атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу Сихъу Рэ­мэзан.