Адыгеим и ЛIышъхьэу КъумпIыл Мурат Красногвардейскэ къоджэ псэупIэм щыIагъ, инфраструктурэмрэ социальнэ псэуалъэхэмрэ яшIынкIэ ыкIи ягъэцэкIэжьынкIэ лъэпкъ проектхэмрэ къэралыгъо программэхэмрэ зэшIохыгъэ зэрэхъухэрэр ыуплъэкIугъ.
ЗэкIэ рахъухьэгъэ IофшIэнхэр пIалъэу агъэнэфагъэхэм яхъулIэу агъэцэкIэщтых. Мы илъэсым ыкIэм нэс псауныгъэм икъэухъумэнрэ физкультурэмрэ япхыгъэ комплексыр селоу Красногвардейскэм къыщызэIуахыщт, культурэм икъоджэ Унэ Адэмые Iоф щишIэу ригъэжьэжьыщт, общественнэ чIыпIэхэмрэ гъогухэмрэ нахь зэтырагъэпсыхьащтых. Адыгеим и ЛIышъхьэ а псэуалъэхэм язытет къыплъыхьэ зэхъум къоджэдэсхэм ящыIакIэ нахь Iэрыфэгъу хъунымкIэ амалхэу арагъэгъотыхэрэм ынаIэ атыридзагъ. Лъэпкъ проектхэмрэ къэралыгъо программэхэмрэ яамалхэр нахь игъэкIотыгъэу ащ пае республикэм къыщызыфагъэфедэх.
Лъэпкъ проектэу «Демографием» ишIуагъэкIэ селоу Красногвардейскэм физкультурэ-спорт комплексыкIэ къыдэуцуагъ. Квадрат метрэ 2200-рэ хъурэ унэм джэгупIэ зал, нэбгырэ 220-мэ ателъытэгъэ трибунэхэр, тренажернэ зал, зытIэкIыпIэхэр, зыгъэпскIыпIэхэр, административнэ унэхэр хэтых. Илъэсэу икIыгъэм лъэпкъ проектэу «Демографием» къыдыхэлъытагъэу федеральнэ проектэу «Спорт — норма жизни» зыфиIорэм диштэу мы псэупIэм щызэтырагъэпсыхьагъ стадионэу «Олимпыр». Къэралыгъо программэу «Культурэм хэхъоныгъэ егъэшIыгъэныр» зыфиIорэм диштэу искусствэхэмкIэ кIэлэцIыкIу еджапIэр агъэцэкIэжьыгъ, ащ ыпэкIэ культурэм ирайон Унэ игъэкIотыгъэ гъэцэкIэжьын IофшIэнхэр рашIылIагъэх, паркри нахь зэтырагъэпсыхьагъ.
Ащ нэмыкIэу мы илъэсым район гупчэм ветеринар участкэр зычIэтыщт унакIэ щагъэпсыгъ. ЧIыгулэжьхэм грант IэпыIэгъоу арагъэгъотырэм къыдыхэлъытагъэу чъыгхатэхэм чанэу ахагъахъо, хъызмэтшIапIэхэр цумпэ лъэпкъ зэфэшъхьафхэм ялэжьын ыуж ихьагъэх.
Къуаджэу Адэмые лъэпкъ проектэу «Культурэм» диштэу апэрэу гъэцэкIэжьын IофшIэнхэр культурэм и Унэ рашIылIагъэх. Нафэу зэрэщытымкIэ, ар 1959-рэ илъэсым ашIыгъагъ. ГъэцэкIэжьын IофшIэнхэр зэрэкIохэрэм Адыгеим и ЛIышъхьэ зыщигъэгъозагъ. Мыщ иинженер коммуникациехэр зэкIэ зэблахъугъэх, шъхьаныгъупчъэхэр, пчъэхэр, джэхашъохэр агъэкIэжьыгъэх, унэкIоцI IофшIэнхэр зэшIуахыгъэх, унэ гупэр зэтырагъэпсыхьагъ. А IофшIэнхэм сомэ миллион 23-м ехъу апэIухьагъ.
Къихьащт мазэм культурэм и Унэу агъэкIэжьыгъэм ипчъэхэр къоджэдэсхэм къафызэIуихыщтых ыкIи творческэ IофшIэныр лъагъэкIотэн амал ахэм яIэ хъущт. Ныбжь зэфэшъхьаф зиIэхэм апае кружокхэр ащ щызэхащэщтых, щыIэкIэ-псэукIэ тэрэзыр зыфэдэн фаер алъэгъэIэсыгъэным, яхэгъэгу агъэлъапIэу ныбжьыкIэхэр пIугъэнхэм ыкIи нэмыкIхэм лъэшэу анаIэ щатырагъэтыщт.
«ЦIыфхэм ятворческэ амалхэр къызэIуахынхэмкIэ, зыфэдэ къэмыхъугъэ культурнэ кIэн баеу тиIэр къэтыухъумэнымкIэ ищыкIагъэр зэкIэ дгъэцэкIэщт», — къыIуагъ АР-м и ЛIышъхьэу КъумпIыл Мурат.
Шъугу къэтэгъэкIыжьы: 2017-рэ илъэсым къыщыублагъэу 2022-рэ илъэсым нэс культурэм иунэ 45-рэ агъэцэкIэжьыгъ, кIэу 9 ашIыгъ, Адыгэкъалэ дэт музеир агъэцэкIэжьыгъ, АР-м и Лъэпкъ музей зэтырагъэпсыхьагъ, искусствэхэмкIэ кIэлэцIыкIу еджэпIэ 21-м щыщэу 7-р агъэцэкIэжьыгъ, джыри ащ фэдэ еджэпIитIумэ язэтегъэпсыхьан макIо, модельнэ тхылъеджэпIэ 12 къызэIуахыгъ, Пушкиным ыцIэкIэ щыт унэр, сурэткъэгъэлъэгъопIэ галереер, культурэмкIэ Лъэпкъ гупчэр, искусствэхэмкIэ колледжыр агъэцэкIэжьыгъэх, а учреждениехэр мылъку-техникэ лъэныкъомкIэ зэтырагъэпсыхьэх.
Адыгеим и ЛIышъхьэ анаIэ тыраригъэдзагъ социальнэ псэуалъэхэм язэтегъэпсыхьанрэ ахэм къапэIулъ чIыпIэхэм ягъэкIэрэкIэнрэ. А пшъэрылъыр зэшIохыгъэ хъуным пае республикэр лъэпкъ проектхэмрэ къэралыгъо программэхэмрэ ахэлажьэ. Адыгэ Республикэм и ЛIышъхьэ Адэмые зыщэIэм а IофшIэнхэм афэхъурэ кIэуххэр зыфэдэхэр ыуплъэкIугъ. «Къуаджэхэм зэдиштэу хэхъоныгъэ ягъэшIыгъэныр» зыфиIорэ къэралыгъо программэм диштэу километритIу зикIыхьэгъэ гъогум ишIын аухы, ащ псырыкIуапIэхэр ыкIи нэмыкIхэр къыдыхэлъытагъэх, урамхэм якъэгъэнэфын епхыгъэ IофшIэнхэри макIох.
Ащ нэмыкIэу республикэм и ЛIышъхьэ къуаджэу Адэмые дэт мэщытым щыIагъ. Мы чIыпIэм щыпсэурэ меценатым ишIуагъэкIэ унэм игъэкIотын гъэцэкIэжьынхэу щаублагъэхэр ыкIэм фэкIох. Унашъхьэр, шъхьаныгъупчъэхэр, пчъэхэр, унэм игъэфэбэнрэ псыр IэкIэгъэхьэгъэнымрэ япхыгъэ системэхэр зэкIэ зэблахъугъахэх. Унэ гупэри агъэкIэжьыгъ, унэкIоцI IофшIэнхэр ыкIэм фэкIох, мэщытым къыпэIулъ чIыпIэр зэтырагъэпсыхьагъ. Мы илъэсым ыкIэм нэс IофшIэнхэр зэкIэ аухынхэу щыт. Адыгеим и ЛIышъхьэ меценатым зэрэфэразэр къыхигъэщыгъ ыкIи цIыфхэм ягушъхьэлэжь баиныгъэ зыкъегъэIэтыгъэнымкIэ ащ фэдэ шIушIэ IофшIэным мэхьанэшхо зэриIэр къыIуагъ.
АР-м и ЛIышъхьэ ипресс-къулыкъу
Сурэтхэр А. Гусевым тырихыгъэх.