Лъэпкъ проектэу «ЕзгъэжьэгъэкIэ фермер» зыфиIорэм амалэу къытыхэрэр Кощхьэблэ районым дэгъоу щагъэфедэ. Фермерхэм хъызмэтшIапIэхэр зэхащэнхэм ыкIи IэпыIэгъу афэхъуным район администрацием ренэу ынаIэ атырегъэты. Грантэу «Агростартап» зыфиIорэр предпринимательхэм къыдахы.
Ахэм ащыщ ЛIуп Артур. Ащ чIыгу гектари 5,5-рэ егъэлажьэ. Мэкъумэщ хъызмэт зэхэзыщэхэрэм хабзэр къызэрадэIэпыIэрэр зешIэм ар къызфигъэфедэнэу рихъухьагъ. Районым мэкъу-мэщымкIэ и ГъэIорышIапIэ, гупчэу «Мой бизнесым» иIофышIэхэр къыдэIэпыIэхэзэ тхылъэу ищыкIэгъэщтхэмрэ бизнес-планымрэ ыгъэхьазырыгъэх.
Грантыр къыдихыгъ, сомэ миллионрэ мин 780-рэ къыратыгъ. Ащ ежь иахъщи хигъахъуи, къэцмэркIо лъэпкъэу ежевикэр къыгъэкIынэу ыуж ихьагъ.
Артур къызэриIорэмкIэ, мыр зы чIыпIэм илъэс 15 – 20-рэ къыщэкIы. Куандэхэм къапыкIэрэ къэцмаркIор IэшIу ыкIи Iэзэгъу. Ежьым лъэпкъ зэфэшъхьафитф къыхихыгъ, тапэкIи а пчъагъэм хигъэхъон игухэлъ.
Ежевикэм дэгъоу удэлажьэу, ищыкIэгъэ пстэур зебгъэгъотыкIэ, илъэситIу-щыкIэ лэжьыгъэ къытэу зэрэригъэжьэщтыр Артур къыIуагъ.