Адыгеим и ЛIышъхьэу КъумпIыл Мурат Мыекъопэ медицинэ колледжыр мылъку-техникэ лъэныкъомкIэ нахь зэтегъэпсыхьагъэ хъуным епхыгъэ IофшIэнхэр зэрэкIохэрэм зыщигъэгъозагъ.
Республикэм и ЛIышъхьэ пшъэрылъ зэрафишIыгъэм тетэу 2022 – 2023-рэ илъэсхэмкIэ республикэ бюджетым сомэ миллион 50,6-рэ а гухэлъхэм апае къыхагъэкIыгъ.
Джыдэдэм колледжым иунэхэр агъэцэкIэжьых. Ащ нэмыкIэу ящыкIэгъэщт Iэмэ-псымэхэр, мебелыр ыкIи техникэр къащэфыгъэх.
КъумпIыл Мурат къызэрэхигъэщыгъэмкIэ, республикэм иеджэпIэ анахьыжъхэм зыкIэ ащыщ медколледжыр игъом гъэцэкIэжьыгъэным ыкIи ищыкIагъэхэр IэкIэгъэхьэгъэнхэм мэхьанэшхо иI. Нафэу зэрэщытымкIэ, гурыт медицинэ IофышIэхэр ащ щагъэхьазырых, яшIэныгъэхэм ахэгъэхъогъэнымкIэ программэ гъэнэфагъэхэри щызэшIуахых. 2010-рэ илъэсым Мыекъопэ медицинэ колледжыр Урысые Федерацием имедицинэ колледж анахь дэгъуи 100-м ахэхьагъ.
Урысые Федерацием и Президент ышIыгъэ унашъом тетэу Мыекъопэ медицинэ колледжым бюджет чIыпIэу иIагъэр 200-м нагъэсыгъ (ыпэкIэ 160-рэ зэрэхъущтыгъэр), 2023-рэ илъэсым бюджет чIыпIэу яIэр 240-рэ хъущт.
«Медицинэ колледжым игъэкIэжьын республикэм имедицинэ учреждениехэр врачхэу ыкIи сестрахэу зыщыкIэхэрэр игъэкъужьыгъэнхэмкIэ ишIогъэшхо къэкIощт. Джырэ уахътэм диштэрэ Iэмэ-псымэхэр къызфагъэфедэхэзэ Iэрыфэгъоу щыт унэхэм студентхэр ащегъэджэгъэнхэм, нэужым ахэр зиIоф хэшIыкIышхо фызиIэ специалистхэу хъунхэм мэхьанэшхо иI. ЕтIани колледжыр Мыекъуапэ игупчэ итышъ, къалэм итеплъэ изэхъокIын тегъэпсыхьэгъэ IофшIэнэу зэшIуахыхэрэм язы Iахьэу а Iофыр хъущт», — къыIуагъ АР-м и ЛIышъхьэ.
Медицинэ колледжым тарихъ мэхьанэ иI, ар архитектурэм исаугъэт. 1910-рэ илъэсым ашIыгъэ унэр ублэпIэ училищэу щытыгъ. Колледжым икорпус шъхьаIэ къалэу Мыекъуапэ итарихъ фэгъэхьыгъэ Iофтхьабзэу зэхащэхэрэм адиштэу зекIохэр къекIуалIэх.
УплъэкIун Iофтхьабзэхэм ялъэхъан республикэм и ЛIышъхьэ пшъэрылъ заулэ афишIыгъ. Ахэр зэпхыгъэхэр псэолъапхъэу агъэфедэрэм изытет, унэ кIоцI коммуникациехэр зэблэхъугъэнхэр, гъэцэкIэжьынхэр зыщыкIорэ лъэхъаным студентхэм яегъэджэн зэрэзэхэщэгъэщт шIыкIэр ары.
Мыекъуапэ имэр хэушъхьафыкIыгъэу пшъэрылъ фишIыгъ ощхыпсыр зэрылъэдэрэ чIыпIэу медколледжым пэблагъэу щытыр зэтырагъэпсыхьанэу ыкIи ащ къыпэIулъ чIыпIэхэр нахь агъэкIэрэкIэнхэу.
АР-м и ЛIышъхьэ ипресс-къулыкъу
Сурэтхэр А. Гусевым тырихыгъэх.