Непэ Урысыем дунэе мэхьанэ иIэу хьисап гупчи 4-мэ ыкIи шъолъыр гупчэ 11-мэ Iоф щашIэ. Ахэм ахэхьэ Адыгэ къэралыгъо университетым и Кавказ хьисап гупчэ.
Урысыем и Хьисап гупчэхэм афэгъэхьыгъэ ятIонэрэ конференциеу мы мафэхэм щыIагъэм Адыгеим илIыкIохэр хэлэжьагъэх. Ахэр Кавказ хьисап гупчэм ипащэу, прикладной хьисапымкIэ ыкIи информатикэмкIэ физтех-еджапIэм ипащэу Андрей Райгородскэр, Адыгэ къэралыгъо университетым иректорэу Мамый Даут, хьисапымкIэ ыкIи компьютер шIэныгъэхэмкIэ факультетым идеканэу СтIашъу Айдэмыр, прикладной хьисапымкIэ, информационнэ технологиехэмкIэ ыкIи информационнэ щынэгъончъэнымкIэ кафедрэм идоцентэу Всеволод Вороновыр.
Конференциер Москва къэралыгъо университетым ыкIи В. А Стекловым ыцIэ зыхьырэ Хьисап институтым ащыкIуагъ. Мэфитфым нэбгырэ 14-мэ докладхэр къашIыгъэх. Джырэ хьисапым фэгъэхьыгъэ секцие 13-мэ Iоф ашIагъ.
ЗэкIэмкIи шIэныгъэлэжь 500 фэдиз Iофтхьабзэм хэлэжьагъ. 2022-рэ илъэсым хьисапымкIэ ыкIи шIэныгъэ зэфэшъхьафхэм алъэныкъокIэ анахь мэхьанэ зиIэхэм ащыщ ар хъугъэ.
Шъугу къэдгъэкIыжьын, Кавказ хьисап гупчэр 2018-рэ илъэсым къызэIуахыгъ. Урысыем, Къыблэ шъолъырым ыкIи Адыгэ Республикэм хьисап шIэныгъэхэм ащахэгъэхъогъэным, защягъэушъомбгъугъэным ыкIи ушэтыныкIэхэр ащашIынхэм фэщэгъэнхэм фэшI Iофтхьабзэр зыкIызэхащэгъагъэр. Москва физикэ-техническэ институтым, В. А. Стекловым ыцIэ зыхьырэ Хьисап институтым, Гъэсэныгъэ гупчэу «Сириус» зыфиIорэм, Фондэу «Траектория» зыфиIорэм, Республикэ естественнэ-хьисап еджапIэм ыкIи сэнаущыгъэ зыхэлъ ныбжьыкIэхэм якъыхэгъэщын фэлажьэрэ Шъолъыр гупчэу «Полярис-Адыгея» зыфиIорэм Кавказ хьисап гупчэр адэлажьэ ыкIи проектхэр щыIэныгъэм щыпхыращых.
2021-рэ илъэсым Кавказ хьисап гупчэм шIэныгъэ-гъэсэныгъэ Iофтхьэбзэ 26-рэ щызэхащагъ. Ахэм Урысыем ыкIи IэкIыбым ащыщ шIэныгъэлэжьи 150-рэ, кIэлэеджэкIо, студент, магистрант ыкIи аспирант мини 4-м ехъу ахэлэжьагъ. Гъэсэныгъэ курс ыкIи модуль 25-рэ щыIэныгъэм щыпхыращыгъ. УшэтэкIо, хьисапымкIэ ыкIи информатикэмкIэ кIэлэегъэджэ 40-мэ яшIэныгъэхэм ахагъэхъуагъ. Гупчэм щызэхащэрэ Iофтхьабзэхэм ахэлэжьэгъэ кIэлэеджэкIо 73-мэ хьисапымкIэ ыкIи информатикэмкIэ Урысые олимпиадэхэм текIоныгъэ е хагъэунэфыкIырэ чIыпIэхэр къащадахыгъ.