Тыгъуасэ Теуцожь районым ит къуаджэу Пщыкъуйхьаблэ зэIукIэгъоу щыкIуагъэр цумпэ зэфэшъхьафхэм якъэгъэкIын зыфэгъэхьыгъагъэр.
Iофтхьабзэм кIэщакIо фэхъугъэх предпринимательхэм IэпыIэгъу ятыгъэным фэгъэзэгъэ Гупчэу «Мой бизнесымрэ» пшъэдэкIыжьэу ыхьырэмкIэ гъунэпкъэ гъэнэфагъэ зиIэ хъызмэтшIапIэу «Адыгеим ичъыгхатэхэр» зыфиIорэмрэ. АР-м мэкъу-мэщымкIэ и Министерствэрэ Теуцожь районым мэкъу-мэщымкIэ и ГъэIорышIапIэрэ IэпыIэгъу афэхъугъэх.
Iофтхьабзэм хэлэжьагъэх АР-м мэкъу-мэщымкIэ иминистрэ игуадзэу Сергей Шопиныр, АР-м ифермерхэм я Союз итхьаматэу Дзэхъохъу Аслъан, чIыгулэжьыным пылъ предпринимательхэр.
Зэхэсыгъор рагъэжьэным ыпэкIэ хъызмэтшIапIэу «Адыгеим ичъыгхатэхэр» зыфиIорэм ихьасэу голубикэр къызщагъэкIырэм рагъэблэгъагъэх. Мыщ фэдэ цумпэ зыгъэтIысхьагъэу Адыгеим итыр мы зыр ары. Голубикэм цIыфым ипсауныгъэкIэ шIуагъэу хэлъыр, къызэрэбгъэкIыщтыр къэзэрэугъоигъэхэм къафаIотагъ, къарагъэлъэгъугъ.
— Гъомылапхъэхэр IэкIыбым къитымыщэу мыщ къыщыдгъэкIырэр дгъэфедэным тыкъыфэкIоныр ары пшъэрылъ шъхьаIэу хъызмэтшIапIэм ипащэхэм зыфагъэуцужьыгъэр, — къыIуагъ Теуцожь район администрацием мэкъу-мэщымкIэ и ГъэIорышIапIэ ипащэу ХьэдэгъэлIэ Мэджыдэ гущыIэгъу тызыфэхъум. – Голубикэу тибэдзэршIыпIэхэм, тучан мэкIайхэм ателъыр, зэкI пIоми хъунэу, IэкIыбым къыращыгъ. Мары мы тыкъыздэкIогъэ хьасэм мыгъэ апэрэу цумпэхэр къыпыкIагъэх. Специалистхэм къызэраIорэмкIэ, апэрэ илъэс нахь мышIэми, мыдэеу къытыгъ. ЯопыткIэ нэмыкI чIыгулэжьхэми адэгуащэхэу, ахэм ащыщхэри ыуж ихьэхэмэ, федэ къызэрихьыщтыр нафэ.
Республикэу Беларусь къикIыгъэ шIэныгъэлэжьэу Татьяна Курлович голубикэ куандэхэм ахэтэу Адыгеим ичIыгухэм ар къащыбгъэкIынымкIэ ищыкIагъэхэр къафиIотагъ, къаригъэлъэгъугъ.
Нэужым Пщыкъуйхьаблэ дэт культурэм и Унэ щыкIогъэ зэхэсыгъоми мы Iофыгъом итегущыIэн щыпадзэжьыгъ. Пстэумэ апэу, илъэс къэс Москва щыкIорэ мэкъумэщ форумэу «Дышъэ бжыхь» зыфиIорэм ООО-у «Адыгеим ичъыгхатэхэр» зыхэлажьэм тыжьын медалэу ыкIи дипломэу къыщихьыгъэхэр ащ ипащэу Еутых Руслъан къыритыжьыгъэх. Цумпэ зэфэшъхьафхэм якъэгъэкIын Адыгеим зыщегъэушъомбгъугъэнымкIэ пшъэрылъыбэ зэряIэр, зэIукIэгъум ишIуагъэ мымакIэу къызэрэкIощтыр министрэм игуадзэ къыхигъэщыгъ, шIуагъэ къытэу яIофшIэн лъагъэкIотэнэу къафэлъэIуагъ.
Татьяна Курлович имызакъоу, нэмыкI шIэныгъэлэжьхэри мы Iофтхьабзэм хэлэжьагъэх. Цумпэхэм якъэгъэкIын шъэфэу хэлъхэр, анахьэу анаIэ зытырагъэтын фаехэр, чIыгъэшIоу ящыкIагъэхэр, нэмыкIыбэ ахэм къаIотагъ. Нэужым чIыгулэжьхэм яупчIэхэм джэуапхэр къаратыжьыгъэх.
ХЪУТ Нэфсэт.