Сабый къэхъугъакIэм ихьадэ къагъотыгъ

2022-рэ илъэсым шэкIогъум и 12-м сыхьатыр 18.30-м адэжь Адыгэкъалэ щыIэ псэупIэ-коммунальнэ хъызмэтшIапIэм иIофышIэхэм пыдза­фэхэр зыщыратэкъурэ чIыпIэм къэхъугъэкIэ пшъэшъэ­жъые цIыкIум ихьадэ къыщагъотыгъ. ПэшIоры­гъэшъэу зэрагъэунэфыгъэмкIэ, сабыим ихьадэ къы­зыхагъотэгъэ пыдзафэр Тэхъутэмыкъое рай­оным ит поселкэу Инэм къыращыгъ.

Урысыем и Следственнэ комитет иследственнэ ГъэIорышIапIэу Адыгеим щыIэм ипресс-къулыкъу къызэритыгъэмкIэ, следовательхэр ыкIи криминалистхэр, джащ фэдэу хэгъэгу кIоцI къулыкъум иIофышIэхэр мы чIыпIэм псынкIэу къэсыгъэх. БзэджэшIэгъэ нэшанэ зиIэ укIын Iоф зэрэзэрахьагъэм, ашIэзэ сабый къэхъугъакIэр зэраукIыгъэм епхыгъэу Тэхъутэмы­къое межрайонн следственнэ отделым уголовнэ Iоф къызэIуихыгъ.

Мы бзэджэшIагъэм лъапсэ фэхъугъэм, сабый къэхъугъакIэр зыукIыжьыгъэ ныр къычIагъэщыгъэмэ, ащ пшъэдэкIыжьэу рагъэхьыщтыр зыфэдэм тыщыкIэупчIагъ Урысыем и Следственнэ комитет иследственнэ ГъэIорышIапIэу Адыгеим щыIэм. ГъэIорышIапIэм ипресс-секретарь тызэрэщигъэгъозагъэмкIэ, мы мафэм ехъулIэу зэхэфыгъэ джыри щыIэп. Уголовнэ Iофэу къызэIуахыгъэм диштэу хьыкум экспертизэхэр агъэнэфагъ, мы хъугъэ-шIагъэм лъапсэу фэхъугъэм икъычIэгъэщынкIэ, джащ фэдэу сабый къэхъугъакIэр зыукIыжьыгъэ ным икъыхэгъэщынкIэ следственнэ ыкIи процессуальнэ зэхэфынхэр макIох.

Адыгеим ихэбзэухъумэкIо къулыкъухэм республикэм, анахьэу Тэхъутэмыкъое ыкIи Теуцожь районхэм, джащ фэдэу Краснодар краим пэгъунэгъу чIыпIэхэм ащыпсэухэрэм лъэIукIэ зафагъазэ. Мы бзэджэшIагъэм епхыгъэ къэбарым щыгъуазэхэмэ телефон номерхэмкIэ: 8-961-818-88-58; (8772) 59-64-00 (къалэу Мыекъуапэ), (87771) 96-5-02 (Тэхъутэмыкъое район), (87772) 91-4-31 (Теуцожь район) цIыфхэр къатеонхэу ялъэIух.

ШъуцIэ, шъулъэкъуацIэ тыди къыщыхагъэщыщтэп.

КIАРЭ Фатим.