Нэныжъ Рэмэзан: «Хэгъэгур къэсыухъумэныр сипшъэ­дэкIыжь»

Тикъэралыгъо ищынэгъончъагъэ икъэухъумэн джырэ уахътэм Адыгеим икIыгъэхэр чанэу хэлажьэх. Ахэм зэу ащыщ Теуцожь районым ит къуаджэу Пэнэжьыкъуае щыпсэурэ Нэныжъ Рэмэзан. Ар хэушъхьафыкIыгъэ дзэ операцием зыщыIэр мазэрэ ныкъорэ хъугъэ. Янэу Джантыгъэ гущыIэгъу тыфэхъугъ.

НымкIэ нахь къин хъужьырэп икIалэ зыщымырэхьат чIыпIэм зэрэщыIэр ышIэу, щынагъоу къышъхьарытыр къыгурыIоу, къызэрэкIожьыщтым ежэу щысыныр.

— Мобилизациер къежьи, повесткэхэр аратэу зызэхэтэхым сысэмэркъэоу «къып­фахьыгъэ­кIи узгъэкIощтэп, узгъэбылъыщт» есIуагъ. Сызщыгугъунэу сиIэр а кIалэр ары, ятIонэрэр сымадж. Ны пстэури фэещтэп икIалэ чIыпIэ щына­гъом ащэнэу. Ау есIуагъэм къыдыригъэшта­гъэп. «Тян, сы­хъулъфыгъ сэ, хэгъэгур къэсыухъумэныр сипшъэдэкIыжь. Зыз­гъэбылъыныр къыстефэрэп, уикIэпхын чIэгъ сычIэбгъэтIысхьагъэми, къэсыгъэ зыхъукIэ зи хэпшIыхьащтэп» къысиIуагъ. Охътэ гъэнэфагъэ тешIагъэу, унэм симысэу кIалэм повесткэр къыфахьыгъ ыкIи къаIихыгъ. Сыд есшIэн, илъэс 30 зыныбжьым сэ унашъо фэсшIыщтэп ныIа? Джарэущтэу Рэмэзан хэушъхьафыкIыгъэ дзэ операцием хэлэжьэнэу хъугъэ, — нэпсым зэлъиштэгъэ бзылъфыгъэм ера­гъоу къеIуатэ.

Нэныжъ Джантыгъэ игухэкIэу къыхигъэщыгъэхэм ащыщ цIыф­хэм хэшIыкI фырямыIэу къэбар зэфэшъхьафхэр зэрэзэтыраIу­кIырэр. Рэмэзан ахъщэ къыгъэ­хъэнэу фаеу кIуагъэ зыIохэрэри зэхехых.

— СикIалэ Iоф ымышIэу, ахъщэ къымыгъахъэу щысыгъэп. «Дортранссервис» зыфиIорэм гъогушIэу Iутэу лэжьэпкIэ дэгъу иIагъ, ятэу Мурати ащ щэлажьэ. Мары шъолъэгъу, машэлахьэу тэпсэу, фэныкъуагъэ тиIэп. Рэ­мэзан зыми ригъэзы­гъэп, ихэгъэгу ыпашъхьэ пшъэ­дэкIыжьэу иIэр ыгъэцэкIэныр къыхихыгъ, — къыIуагъ дзэкIолIым янэ.

Ны-тыхэм якIалэ зэпхыныгъэ дыряIэу загъорэ телефонкIэ дэгущыIэх, фэтхэх. ЧIыпIэу зы­дэщыIэм елъытыгъэу къафытеоу къыхэкIы.

Джантыгъэ къыхигъэщыгъ Пэнэжьыкъое къоджэ псэупIэм иадминистрацие лъэшэу анаIэ къазэратетыр. Ащ ипащэу Кушъу Аслъан бэрэ къафытео, щыкIагъэ горэ яIэмэ къыкIэ­упчIэ.

— Тхьэм ишыкуркIэ, тшхыни, зыщытлъэни, нэмыкIи тэгъотых, — къеIуатэ Джантыгъэ. — Ти­чIыунэ псыр къихьи, гъэцэкIэ­жьынхэр тшIынхэ фаеу хъугъэ. Мобилизацием хэмыфэзэ ащ иттэкъонэу ятIэ Рэмэзан къыдаригъэщыгъэу щы­лъыгъ. Яти бэрэ Iоф зэришIэрэм къы­хэ­кIыкIэ игъо фифэрэп. Ти­къоджэ администрацие ипащэу Кушъу Аслъан ыпашъхьэ къызыщысэIом, цIыфхэр къыгъакIохи ятIэр къытфыратэкъуагъ. АщкIэ пстэуми тафэраз. Джащ фэдэу Рэмэзан исабыитIу фэ­гъэкIотэнэу щыIэр зэкIэ ара­гъэгъоты.

Ныр зыкIэхъопсырэ закъор ежь икIали, адрэ ащагъэхэри псаоу къагъэзэжьыныр ары. Тхьэм ар къадигъэхъунэу тэри тыфелъэIу.

Шъугу къэдгъэкIыжьын, АР-м и ЛIышъхьэу КъумпIыл Мурат хэушъхьафыкIыгъэ дзэ операцием хэлажьэхэрэм яунагъохэм социальнэ ыкIи нэмыкI IэпыIэгъоу ящыкIа­гъэр зэкIэ зэрифэшъуашэм тетэу ара­гъэ­гъотынэу ащ фэгъэзэгъэ къулыкъу­хэм, муниципальнэ псэупIэхэм япащэхэм унашъо афишIыгъ. Ащ къыдыхэлъытагъэу чIыпIэ- хэм IофшIэкIо купхэр ащызэхаща­гъэх.
Iэшъынэ Сусан.