Хабзэ зэрэхъугъэу, илъэс къэс шэкIогъум и 16-м Урысыем самбэмкIэ и Мафэ тихэгъэгу щыхагъэунэфыкIы. Урысые Федерацием и Федеральнэ ЗэIукIэ и Къэралыгъо Думэ идепутатэу Хьасанэкъо Мурат Адыгеим самбэмкIэ итренерхэм, испортсменхэм, мы спорт лъэпкъыр зикIасэхэм ямэфэкIкIэ къафэгушIуагъ.
— Урысыем самбэмкIэ и Мафэ фэшI сыгу къыздеIэу сышъуфэгушIо. Мы спорт лъэпкъым имэфэкI зыхагъэунэфыкIырэр мыгъэ илъэс 84-рэ хъугъэ, адрэ спорт лъэпкъхэм хэпшIыкIэу ар къахэщы. Тихэгъэгу ипащэхэм къыхахыгъэ проектэу «СамбэмкIэ бэнэнхэу гурыт еджапIэхэм ащыгъэсэгъэнхэ фае!» зыфиIорэр яхэгъэгу шIу алъэгъоу спортсмен ныбжьыкIэхэр пIугъэнхэм фэIорышIэ», — къыIуагъ КъумпIыл Мурат.
Къэралыгъо Думэм идепутат зэрэхигъэунэфыкIыгъэмкIэ, Урысыери, зэрэдунаеуи зыпштэкIэ, самбэмкIэ Мыекъопэ еджапIэр анахь пэрытхэм ащыщ. Мыщ щагъэсэгъэ спортсменхэр СССР-м, дунаим, Европэм ячемпионатхэм, Урысые Федерацием зэхищэгъэ зэнэкъокъухэм бэрэ щатекIуагъэх, я 2-рэ, я 3-рэ чIыпIэхэр къащахьыгъэх. Спортыр зикIасэхэр непи самбэмкIэ гъэхъагъэу тиспортсменхэм яIэхэм арэгушхох, Адыгеим испортсмен ныбжьыкIэхэм зэнэкъокъу зэфэшъхьафхэм текIоныгъэхэр къащыдахых.
— Урысыем самбэмкIэ и Мафэ фэшI джыри зэ сышъуфэгушIо, спортымкIэ анахь лъэгэпIэшхохэм анэсынхэу тренерхэми, спортсменхэми сафэлъаIо, ветеранхэм псауныгъэ пытэ яIэнэу, ягъашIэ кIыхьэ хъунэу афэсэIо! — афэлъэIуагъ Хьасанэкъо Мурат.