Дзэ-патриотическэ клубэу «Новобранец» зыфиIорэм хэушъхьафыкIыгъэ дзэ операцием хэлэжьэрэ дзэ къулыкъушIэхэм зэрадырагъаштэрэм тегъэпсыхьэгъэ патриотическэ Iофтхьабзэр тыгъуасэ Мыекъуапэ щызэхищагъ, автомобилькIэ къыщызэпэчъагъэх. Урысыемрэ Адыгеимрэ ябыракъхэр зыIыгъыгъэ автомобиль 15 Iофтхьабзэм хэлэжьагъ.
Сыхьатыр 16-м къызэпачъэр АР-м и Къэралыгъо филармоние дэжь щырагъэжьагъ, заом хэкIодагъэхэм ясаугъэт дэжь щаухыгъ. Урысыем, ТекIоныгъэм, ДОСААФ-м ябыракъхэр автомобильхэм арысхэм аIыгъыгъэх.
Iофтхьабзэм хэлэжьагъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет илIыкIохэр, Адыгеим истудентхэр, Урысыем и ДОСААФ АР-мкIэ ишъолъыр къутамэ иIофышIэхэр, дзэ-патриотическэ клубэу «Новобранец» зыфиIорэм хэтхэр.
«Тихэгъэгу ифедэхэр непэ къэзыухъумэрэ дзэ къулыкъушIэхэм зэрадедгъаштэрэр зэхашIэным мэхьанэшхо иI. Фашизмэм пэшIуекIохэзэ, хэушъхьафыкIыгъэ дзэ операцием хэлажьэхэзэ зипшъэрылъ зыгъэцэкIэрэ тизэолIхэр тэ тщыгъупшэхэрэп. Ахэм зэрадедгъаштэрэр зэхядгъашIэ, ахэр псаухэу ядэжь къагъэзэжьынэу тызэрэфаер ядгъашIэ тшIоигъу», — къыщиIуагъ Iофтхьабзэм АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковым.
Патриотическэ Iофтхьабзэр зытегъэпсыхьэгъагъэр Урысыем идзэ къулыкъушIэхэу хэушъхьафыкIыгъэ дзэ операциеу Украинэм щыкIорэм хэлажьэхэрэм зэрадырагъаштэрэр къагъэлъэгъоныр ары.