Республикэм итворческэ амалхэр

Адыгэ Республикэм и Правительствэ зычIэт унэм тыгъуасэ Адыгэ Республикэм и ЛIышъхьэу КъумпIыл Муратрэ Урысыем икомпозиторхэм я Союз и Правление итхьаматэу Рашид Калимуллинымрэ зэIукIэгъу щызэдыряIагъ.

Академическэ музыкэмкIэ дунэе фестивалэу «Адыгея музыкальная» зыфиIорэм икъызэIухын епхыгъэу Адыгеим ар къэкIуагъ. ЗэIукIэгъум хэлэжьагъэх Адыгэ Республикэм культурэмкIэ иминистрэ иапэрэ гуадзэу Ольга Гавшинар, лъэпкъ орэдымкIэ Адыгеим и Къэралыгъо ансамблэу «Ислъамыем» ихудожественнэ пащэу, АР-м икомпозиторхэм я Союз итхьаматэу, Урысые Федерацием, Адыгеим, Пшызэ, Къэ­бэртэе-Бэлъкъарым, Къэрэщэе-Щэрджэ­сым янароднэ артистэу Нэхэе Аслъан.

Адыгеим и ЛIышъхьэ хьакIэм шIуфэс рихыгъ ыкIи Урысыем икомпозиторхэм я Союз шIуагъэ къэзытыщт зэдэлэжьэныгъэ тапэкIи дыряIэным, джащ фэдэу творческэ IофтхьэбзакIэхэр зэгъусэхэу республикэм щызэшIуахынхэм яфедэ зэрэхэлъыр къыкIигъэтхъыгъ.

«Тиреспубликэ творческэ амал инхэр, цIыф IэпэIасэхэр иIэх. Тэри ахэм IэпыIэгъу тафэхъуным, ныбжьыкIэхэу сэнаущыгъэ зыхэлъхэм яшIэныгъэхэмрэ якъулайныгъэхэмрэ аха­гъэхъонымкIэ амал ядгъэгъотыным тынаIэ тетэгъэты. Творческэ проект инхэм Адыгеир ахэлэжьэным тэркIэ мэхьанэшхо иIэу щыт. Ащ пае Урысые Федерацием икомпозиторхэм я Союз тыригъусэу лъэпкъ искусствэм тапэкIи хэхъоныгъэ ышIынымкIэ, профессиональнэ музыкальнэ культурэм джыри нахь лъагэу зиIэтынымкIэ къыттефэрэр тшIэным тыфэхьазыр. Тэ тыхьазыр гупшысэ ыкIи творческэ ублэпIэ гъэшIэгъонхэм адедгъэштэнэу. ЦIыфхэм якультурэрэ ягъэсэныгъэрэ джыри нахь ахэхъонымкIэ, классическэ искусствэм тицIыфхэм анаIэ нахь тырадзэнымкIэ тфэлъэкIыщтыр тшIэщт», — къыхигъэщыгъ КъумпIыл Мурат.

Республикэм икультурэрэ иискусствэрэ яхэхъоныгъэ ышъхьэкIэ иIахь зэрэхишIыхьэрэм пае Рашид Калимуллиным зэрэфэразэр КъумпIыл Мурат къыIуагъ ыкIи щытхъуцIэу «Адыгэ Рес­публикэм искусствэхэмкIэ изаслуженнэ IофышIэшху» зыфиIорэр композиторым фигъэшъошагъ.

Урысыем икомпозиторхэм я Союз ипащэ къыIуагъ Адыгеим ипрофес­сиональнэ искусствэ лъэгэпIэ иным зэрэнэ­сыгъэр ыкIи ежь ышъхьэкIэ уасэу къыфашIыгъэм пае республикэм ихэбзэ къулыкъухэм зэрафэразэр къы— ­хи­гъэ­щыгъ. Лъэпкъ культурэм джыри нахь зиушъом­бгъуным ренэу ахэм анаIэ зэратырагъэ­тырэр къыIуагъ.

«Сэ апэрэп Адыгеим сыкъызэрэкIорэр. Тазыфагу илъ зэдэлэжьэныгъэр нахь пытэ мэхъу зэпыт. Лъытэныгъэ зыфэсшIырэ Мурат Къэралбый ыкъор, игъоу тлъэгъурэ Iофтхьабзэхэу щыIэныгъэм дэгъоу гъэцэкIагъэ щыхъухэрэм къызэрадебгъаштэрэм пае «тхьауегъэпсэушхо» осэIо. Ахэм зыкIэ ащыщ проектэу «Адыгея музыкальная» зыфиIорэр. Фестивалым ренэу нахь зеушъомбгъу. Мы илъэсым дунэе статус ащ иIэ хъугъэ», — къыхигъэщыгъ Рашид Калимуллиным.

Шъугу къэтэгъэкIыжьы: академическэ музыкэмкIэ дунэе фестивалыр тыгъуасэ Адыгэ Республикэм и Къэралыгъо филар­моние къыщызэIуахыгъ. Адыгеим иапэрэ профессиональнэ композиторэу, Урысы­ем инароднэ артистэу Нэхэе Аслъан имузыкэ а концерт программэр къызэIуихыгъ. Ащ нэужым Урысыем, Бело­рус­сием, Абхъазым, Узбекистан ыкIи Иран якомпозиторхэм аусыгъэхэр къырагъэIуагъэх.

ШэкIогъум и 17-м сыхьатыр 18-м Ра­шид Калимуллиным иавторскэ концерт щыIэщт. Ащ ыусыгъэхэм цIыфхэр ащыгъуазэх, хэгъэгу зэфэшъхьафхэм яоркестрэ анахь дэгъухэм ахэр къырагъаIох. Композиторым жанрэ зэфэшъхьафхэмкIэ Iоф ешIэ: оперэр, симфоническэ ыкIи камернэ произведениехэр, хорым пае аусырэ мэкъамэхэр, орэд зэфэшъхьафхэр. Симфоническэ оркестрэм пае поэмэу «Аслъан» зыфиIорэмкIэ концертым ипрограммэ аублэщт. Ар зыфэгъэ­хьыгъэр композиторэу Нэхэе Аслъан ары. Нэужым концертым къыщыIущтых оркестрэмрэ скрипкэмрэ апае зэхалъхьэ­гъэ мэкъамэхэр, джащ фэдэу къэшъо зэфэшъхьафхэр къашIыщтых.

АР-м и ЛIышъхьэ ипресс-къулыкъу