Дунэе фестивалым шъукъеблагъэх

Академическэ музыкэм и Дунэе фестиваль шэкIогъум и 16 — 18-м Адыгэ Республикэм и Къэралыгъо филармоние щыкIощт.

— Адыгэ Республикэм культурэмкIэ и Министерствэ, АР-м и Къэралыгъо филармоние, Адыгеим икомпозиторхэм я Союз зэхащэрэ Дунэе фестивалым Урысыем, Белоруссием, Абхъазым, Узбекистан, Иран якомпозиторхэм ямузыкэ щыIущт, — къы­тиIуагъ Адыгэ Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ.

«Музыкальнэ Адыгеир» зыфиIорэ Дунэе фестивалым композиторхэу Нэхэе Аслъан, ХьаIупэ Джэбраил, Тото Аджапуа, Рустам Абдулаевым, Рэщыд Калимуллиным, Тхьабысымэ Умарэ, КIыкI Хьисэ, Анзорыкъо Чеслав, Сэмэгу Гощнагъо, фэшъхьафхэм аусыгъэ произведениехэр щыIущтых. ЗэлъашIэрэ музыкантхэм яIэпэIэсэныгъэ къагъэ­лъэгъощт.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ Дунэе фестивалым еплъы зышIоигъохэр ыпкIэ амытэу филармонием чIагъэхьащтых. Шъукъеблагъэх фестивалым.
ЕмтIылъ Нурбый.