«ЭкоЦентрэм» къеты

МинитIум ехъу Iуащыгъ


Мыекъуапэ унэе псэупIэу дэтхэм чъыг ыкIи къутэмэ гъугъэу, пкIашъэу кубометрэ минитIум ехъу шъолъыр операторым къахищыгъ.

— Мыекъуапэ иурамхэм чъыгхэр, кондэ дахэхэр, къэгъагъэхэр бэу зэратетхэмкIэ сыдигъокIи къахэщы. Ащ фэдэу къалэр къэзыгъэдахэу къэкIыхэрэм ящыкIагъэр игъом япшIылIэныр шIокI зимыIэ Iоф. Ахэр къэуупкIыхьанхэ, пкIашъэхэр къэуугъоинхэ фае. Ащ фэшI бжыхьэ уахътэр къызысыкIэ къэкIыхэрэм пы­дзафэу къапыкIырэр игъом Iутщынэу техникэр на­хьыбэ тэшIы, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Хэбзэгъэуцугъэм зэритхагъэмкIэ, сыд фэдэрэ пыдзафи бгъэстын уфитэп. Шъолъыр операторым ар джыри зэ шъугу къегъэкIыжьы. Экологием ишапхъэхэр зымыгъэцакIэхэрэм административнэ пшъэдэкIыжь ахьыщт.

«ЭкоЦентрэм» унэе псэупIэхэм чъыг къутамэхэри, пкIашъэу зэхэугъоягъэхэри аIуищыщтых. Фэтэрыбэу зэхэт унэхэм ащ пае зэзэгъыныгъэ къыдашIын фае.
Коммунальнэ ыкIи къэкIыхэрэм къапыкIыгъэ пы­дзафэхэм ядэщын пае Адыгеим щыпсэухэрэр ыпкIэ хэмылъэу мы телефонхэмкIэ къытеонхэ алъэкIыщт: 8-800-707-05-08, 8-962-868-14-64.

Хьыкумым Iофыр нэсыщт

Красногвардейскэ районым ит уц щапIэхэм ащыщым пыдзафэхэр зэрэ­Iуащыхэрэм ыпкIэ зэримытырэм къыхэкIэу иIоф хьыкумым нэсыгъ. 2020 — 2021-рэ илъэсхэмкIэ чIы­фэр предпринимателым къыты­жьыгъ, 2022-м зэтыригъэхьагъэр ары къэнагъэр. ПстэумкIи сомэ мини 100 фэдиз хъущтыгъ.

— Юридическэ лицэхэм, предпринимательхэм япыдзафэхэр Iуащынхэм пае шъолъыр операторым зэзэгъыныгъэ дашIын фае. Ар 2019-рэ илъэсым ищылэ мазэ и 1-м кIуачIэ зиIэ хъугъэ законым итхагъ. Ар зымыгъэцакIэхэрэм хэкIыр зэрэIуащырэм ыуасэ амытыщтэу къашIошIымэ, хэукъох. Ащ фэдэхэм апэшIуе­кIорэ Iофтхьабзэхэр тапэкIи лъыдгъэкIотэщтых, яIоф хьыкумым нэсыщт, — къыхигъэщыгъ Алыбэрд Налбый.

ХэкIыр зэхэдзыгъэнэу

Фэтэрыбэу зэхэт унэхэм ачIэсхэм хэкIыр зэхэдзыгъэу къырахымэ, пла­стикым хэшIыкIыгъэхэр зэратэкъощт бак 200-м ехъу къалэу Мыекъуапэ, Тэхъутэмыкъое, Джэджэ ыкIи Мые­къо-
пэ районхэм шъолъыр операторым ащигъэуцугъ.

— ХэкI зэхэдзыныр къызэрыкIопышъ, цIыфхэр фэешхохэп. Ащ фэшI пластикым хэшIыкIыгъэ пкъыгъоу адрэ пыдзафэхэм нахь къахэхыгъошIумкIэ зэ­хэдзыныр едгъэжьагъ. Ахэр тхылъыпIэм хэшIыкIыгъэхэм афэдэу ощхым, осым иягъэ аригъэкIырэпышъ, контейнерхэм аратакъоми хъущт, — къыхигъэщыгъ Алыбэрд Налбый.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.