Къыхьыным фэхьазырыгъ

«АГУ-Адыиф» Мыекъуапэ — «Балтийская заря» «Санкт-Петербург» — 33:26 (19:11).

ШэкIогъум и 12-м АР-м испорт Унэшхоу Кобл Якъубэ ыцIэ зыхьырэм щызэIукIагъэх.

Зезыщагъэхэр: Герасимова Анастасия, Герасимова Дарья.

Хэгъэгум гандболымкIэ изэ­нэкъокъоу суперлигэм щыкIорэм хэт командэхэу ауж къинэхэрэр зэдешIагъэх. ЗэIукIэгъум текIоныгъэр къыщыдэзыхын зылъэкIыщтыр ешIэгъум псынкIэу къыщылъэгъуагъ.

«Адыиф»: къэлэпчъэIутхэр: Якупова, Баскакова, ешIакIохэр: Никулина — 5, Кириллова — 3, Морозова — 1, Куцевалова — 3, Казиханова – 2, Кожубекова — 3, Краснокутская — 2, Мещерякова, Вигуржинская — 5, Къэбж — 2, Коваленко, Голунова — 1, Дворцевая — 2, Краснова — 4.

«Балтийская зарям» къыхэщыгъэхэр: Селиверстова — 6, Комкова — 5, Иванова — 4.

ЕшIапIэм икъогъупэхэр ыгъэфедэхэзэ «Адыифыр» нахьыбэрэ ыпэкIэ илъыщтыгъ. Дарина Никулинам, Анна Красновам, Диана Казихановам хъагъэм Iэгуаор радзэнымкIэ шIыкIэшIухэр къагъо­тыщтыгъэх — ухъумакIохэм аIэ­кIэкIыхэзэ къэлапчъэм псынкIэу даощтыгъэх. Гупчэм дэгъоу щешIагъэх Дарья Вигуржинскаяр, Ангелина Куцеваловар. Юлия Кожубековам, Къэбж Заремэ, Алиса Дворцеваям, нэмыкIхэм яIэпэIэсэныгъэ зэрэхагъахъорэм тегъэгушIо.

ЕшIэгъум икIэух пчъагъэм къе­гъэлъагъо: 23:14, 26:17, 30:20, 32:23, 33:26.

ЕплъыкIэхэр

ТекIоныгъэр къызэрэтхьыгъэм тигъэгушIуагъ. Ауж къинэхэрэм тахэкIыжьыным фэшI «Адыифым» иешIакIэ хигъэхъон фае. Вигуржинскаям, Дворцеваям тикомандэ къагъэзэжьыгъ. Коб­лыр, Колодяжнаяр, нэмыкIхэри «Адыифым» шIэхэу къыхэхьажьыщтых, — къытиIуагъ тикомандэ итренер шъхьаIэу, Урысыем изаслуженнэ тренерэу Александр Реввэ.

ШэкIогъум и 18-м «Адыифыр» «Ставропольем», шэкIогъум и 20-м «Астраханочкэм» аIукIэщт. ЕшIэгъухэр Мыекъуапэ щыкIощтых.