Бжыхьэ дзэ дэщыгъом къыдыхэлъытагъэу, Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм яапэрэ куп тыгъуасэ гъогу техьагъ. КъулыкъушIэ нэбгыри 5-р мэфэкI шIыкIэм тетэу агъэкIотагъэх.
Ащ фэгъэхьыгъэ Iофтхьабзэу АР-м идзэ комиссариат щыкIуагъэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, Къыблэ дзэ шъолъырым изэхэт стратегическэ командование иинспектор куп хэтэу Александр Дорофеевыр, гъэцэкIэкIо хабзэм, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
АР-м идзэ комиссариат ипащэу Александр Авериным пэублэ псалъэ къышIызэ, къэзэрэугъоигъэхэм шIуфэс къарихыгъ. Къулыкъур зыхьынэу ращэжьагъэхэр щысэтехыпIэ афэхъунхэу Юнармием хэтхэр къызэрэрагъэблэгъагъэхэр ащ къыхигъэщыгъ. Гъогу техьащт къулыкъушIэ нэбгыри 5-р Краснознаменнэ, Суворовым ыкIи Кутузовым ацIэ зыхьырэ орденхэр зиIэ я 7-рэ гвардейскэ десантштурмовой дивизиеу ЦIэмэз дэтым зэращэхэрэр къыIуагъ.
Владимир Свеженец къулыкъум ежьэгъэ ныбжьыкIэхэм закъыфигъэзагъ. Тызыхэт охътэ мыпсынкIэм къымыгъэщынэхэу, япшъэрылъ щытхъу хэлъэу къагъэцэкIэнышъ, псаоу къагъэзэжьынэу афэлъэIуагъ.
Джащ фэдэу ныбжьыкIэхэм закъыфэзыгъэзагъэхэм ащыщ зыдащэщтхэ дивизием идзэ часть илIыкIоу Дмитрий Кравченкэр. Хэгъэгум ыпашъхьэ пшъэдэкIыжь ахьыным игъо къызэрэсыгъэр ащ хигъэунэфыкIыгъ. Хъулъфыгъэм ишэн-зекIуакIэхэр дзэ къулыкъум щыпсыхьагъэ зэрэхъурэр ащ къыхигъэщыгъ. ХэшыпыкIыгъэ дзэхэм зэрахэфагъэхэр къагурыIозэ, якомандирхэм ядэIунхэу, зыфэсакъыжьынхэу, зэрэдэкIыгъэхэм фэдэу япсауныгъэ зэщымыкъоу ны-тыхэм къафагъэзэжьынхэу, ежь нытыхэри къафэмыгумэкIынхэу къариIуагъ.
— ШъуищыIэныгъэкIэ мэхьанэшхо зиIэ хъугъэ-шIагъэм шъукъекIолIагъ, — къыIуагъ къулыкъушIэхэм ащыщым янэу Надежда Малаховам. — Мы мафэм къыщегъэжьагъэу, шъуашэр зызэрэщышъулъагъэм тетэу шъузэрэдзэкIолIыр къыжъугурыIон фае. ЛIыгъэрэ щэIагъэрэ шъухэлъэу уставым къызэриIорэм тетэу джы шъупсэущт. Ащ акъыл ыкIи кIуачIэ ищыкIагъ. Тэ тыкъышъо-жэщт. Щытхъу хэлъэу къулыкъур къэшъухьи, дахэкIэ къэжъугъэзэжь.
КъулыкъушIэ хъугъэхэм ацIэкIэ къэгущыIагъ Илья Хвецкевич.
— Я 7-рэ десант-штурмовой дивизием тызэрэхэфагъэм лъэшэу тырэгушхо, — къыхигъэщыгъ ащ. — Щытхъу хэлъэу къулыкъур зэрэтхьыщтымкIэ, къызэрэтщыгугъыхэрэр къызэрэдгъэшъыпкъэжьыщтымкIэ гущыIэ шъотэты.
Мыекъопэ гарнизоным иофицерхэм я Унэ къыгъэхьазырыгъэ концерт программэмкIэ зэхахьэр аухыгъ.
Шъугу къэдгъэкIыжьын, мыгъэрэ бжыхьэ дзэ дэщыгъом къыдыхэлъытагъэу Адыгеим щыщ ныбжьыкIэ 400 фэдизмэ къулыкъур ахьыщт, хабзэ зэрэхъугъэу, ахэр чIыпIэ зэфэшъхьафхэм ащэщтых.
Iэшъынэ Сусан.
Сурэтхэр Н. Мальцевам тырихыгъэх.