Зэфэхьысыжьхэр ыкIи пшъэрылъхэр

Адыгеим ипсэупIэхэм джырэ уахътэм псыкъычIэщыпIи 8 ащашIыгъ, ахэм ятIупщын епхыгъэ IофшIэнхэр ыкIэм факIох.

ПсыкъычIэщыпIэхэр ашIынхэ алъэкIыгъ федеральнэ лъэпкъ проектэу «ПсэупIэр ыкIи къэлэ щыIакIэм» ишъолъыр проектэу «Псы къабзэр» зыфиIорэм ишIуагъэкIэ. Мы илъэсым ыкIэм нэс рахъухьэгъэ пшъэрылъхэр зэшIохыгъэхэ хъущт.

Ахэм зэу ащыщ станицэу Ханскэм щашIыгъэ псырыкIуапIэу атIупщы­гъэр. Ащ ишIын сомэ ми­лион 31,2-рэ пэIуагъэ­хьагъ. Адрэ псэуалъэхэм IофшIэнхэр ащаухых. Къы­зэраIуагъэмкIэ, тыгъэ­гъа­зэм и 1-м ехъулIэу тыдэкIи псыр къащатыным фэхьазырыщтых.

Къихьащт 2023-рэ илъэ­сыр пштэмэ, зигугъу къэтшIыгъэ лъэпкъ про­ектэу «ПсэупIэр ыкIи къэлэ щы­IакIэр» зыфи­Iорэм ишъолъыр проектэу «Псы къабзэм» къыдыхэлъытагъэу псэолъи 10-мэ Iоф­шIэнхэр ащыкIонхэу лъэIу тхылъхэр къатыгъэх, зэ­кIэмкIи ащ сомэ миллион 225,1-рэ атефэщт. Ащ къыхеубытэх Теуцожь рай­оным хэхьэрэ псэупIэу Шевчен­кэм щашIырэ псыкъычIэщыпIэм иятIонэрэ чэзыу ыкIи къуаджэу Гъо­бэкъуае щагъэпсырэ мыщ фэдэ псэуалъэу аухынэу щытыр. IофшIэнхэм сомэ миллиони 5,62-рэ апэIуагъэхьащт.

Красногвардейскэ районым ит къуаджэу Улапэ псырыкIуапIэ щагъэпсынэу агъэнэфагъ, ау анахь Iофыбэ зыщашIэнэу щы-тыр Тэхъутэмыкъое районым ит къуаджэу Козэт ары. Мыщ ипсыкъычIэщыпIитIоу урамэу Школьнэм тетхэр агъэцэкIэжьыщтых, урамэу Чкаловым ыцIэ зы­хьырэм ыкIи Западнэм кIэу ащагъэуцущтых.

Мыщ фэдэ IофшIэнхэр ащыкIощтых Адыгэкъалэ, къуаджэхэу Тэхъутэмы­къуае, Хьэлъэкъуае, Мые­къопэ районым ит къутырэу Гражданскэм.

АР-м псэолъэшIынымкIэ, транспортымкIэ, псэу­пIэ-коммунальнэ ыкIи ­гъогу хъызмэтымкIэ и Ми­нистерствэ къызэрэщаIуагъэмкIэ, заявкэу къатыгъэхэмкIэ документациер агъэхьазырыгъ, экспертизэ ашIыгъ, зэзэгъыныгъэхэм акIэтхагъэх. Джы аукционхэр зэхащэхэу, IофшIэнхэр зыгъэцэкIэщт организациехэр къыхахыхэмэ, пшъэры­лъым игъэцэкIэн фежьэнхэ алъэкIыщт.