Хэлажьэхэрэм япчъагъэ хэхъо

Классхэм япащэхэм яятIонэрэ Форум бэмышIэу Москва щыкIуагъ. Iофтхьабзэм кIэщакIо фэхъугъ УФ-м просвещениемкIэ и Министерствэ. Программэм къыдыхэлъытагъэу хэгъэгу проектэу «Билет в будущее» зыфиIорэм интерактивнэ стенд къыщагъэлъэгъуагъ.

Адыгеим ыцIэкIэ форумым хэлэжьагъэх Теуцожь районым ит къуаджэу ПчыхьалIыкъуае игурыт еджапIэ географиемкIэ икIэлэегъаджэу Марга­рита Фарафоновар, Мые­къопэ лицееу N 19-м пэу­блэ классхэмкIэ кIэлэ­егъаджэу Анатолий Ка­за­ковыр, Адыгэкъалэ дэт гурыт еджапIэу N 2-м музыкэмкIэ икIэлэегъа­джэу Джамырзэ Азидэ, Красногвардейскэ районым ит гурыт еджапIэхэу N N 11-м ыкIи 5-м якIэлэегъаджэхэу Юлия Лысянскэмрэ Александр Кардашевымрэ.

Форумым хэлэжьагъэ­хэм ащыщ УФ-м и Об­щественнэ палатэ хэтэу, Гу­манитар ПроектхэмкIэ Фондым ипащэу Иван Есиныр. Ар Iэнэ хъураем къыщыгущыIэзэ, проектэу «Билет в будущее» зыфи­Iорэм фэгъэхьыгъэ зэфэ­хьысыжьхэр къышIыгъэх.

— 2022-рэ илъэсым проектым хэхъоныгъэхэр ышIыгъэх. ДжырэкIэ ныбжьыкIэ миллионрэ мин 300-рэ, кIэлэегъэджэ 17000-рэ ащ хэлажьэ, — къыIуагъ ащ.

АдыгеимкIэ ныбжьыкIэ нэбгырэ 2600-мэ проектым иплатформэ зыщатхыгъ. Ахэм кIэлэегъэджэ­навигатор 40 яIэпыIэгъу.

Форумым къыщагъэ­лъэгъогъэ стендым къегъэ­лъагъо проектым амалэу къытыхэрэр. Мыекъопэ лицееу N 19-м ия 11-рэ класс щеджэрэ Михаил Назаренкэр Урысые Iоф­тхьабзэм хэлэжьагъ.

Шъугу къэдгъэкIыжьын, «Билет в будущее» зыфиIорэ проектыр я 6 — 11-рэ классхэм ащеджэхэрэм апае зэхащагъ. Лъэпкъ про­ектэу «Гъэсэныгъ» зыфиIорэм и Федеральнэ проектэу «Успех каждого ребенка» зыфиIорэм ха­хьэ. Гуманитар ПроектхэмкIэ Фондыр иоператор. 2022-рэ илъэсым апшъэрэ еджапIэхэм ыкIи гурыт сэнэхьат зыщара­гъэгъотырэ еджапIэхэм мультимедийнэ паркхэу «Россия — Моя история» зыфиIорэр ащызэхащэ ыкIи цифрэ шIыкIэм тет платформэу https://bvbinfo.ru. къытырэ амалхэр кIэлэеджакIохэм къызфагъэфедэх.

ДЕЛЭКЪО Анет.