Мыекъопэ къэралыгъо технологическэ университетым студенческэ форумэу «Умный маршрут. Агротехнологии будущего» зыфиIорэр бэмышIэу щыкIуагъ. Урысые обществэу «ШIэныгъ» зыфиIорэмрэ Урысые мэкъумэщ банкымрэ Iофтхьабзэм кIэщакIо фэхъугъэх.
Форумым икъызэIухын хэлэжьагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, Мыекъопэ къэралыгъо технологическэ университетым иректорэу Къуижъ Саидэ, АР-м мэкъу-мэщымкIэ и Министерствэ ихэушъхьафыкIыгъэ отдел ипащэу Шъэожъ Абрек, Урысые обществэу «ШIэныгъэм» и Адыгэ республикэ организацие ипащэу, тарихъ шIэныгъэхэмкIэ докторэу Ацумыжъ Казбек, аграрнэ факультетым идеканэу Шъхьэпэцэ Аслъан.
ХьакIэу къэкIуагъэхэм ахэтыгъэх Урысые мэкъумэщ банкым финанс технологиехэмкIэ и Гупчэ ипащэхэу Элеонора Добровольскаямрэ Ксения Надоричевамрэ, компаниеу «РСХБ-Интех» зыфиIорэм иблок ипащэу Антон Агеевыр, проектэу «Свое Родное» зыфиIорэм ипащэу Максим Коваленкэр, проектэу «Школа фермера» зыфиIорэм икураторэу Жанна Диченкар.
АР-м и ЛIышъхьэу КъумпIыл Мурат ыцIэкIэ Iофтхьабзэм къекIолIагъэхэм шIуфэс къарихыгъ ыкIи республикэм ипащэ иджэпсалъэ къеджагъ Евгений Лебедевыр.
— Урысые обществэу «ШIэныгъэм» тыфэраз. НыбжьыкIэхэм ыкIи Адыгеим иаграриехэм яшIэныгъэхэм ахагъэхъонымкIэ, аужырэ шапхъэхэм адиштэрэ технологиехэмкIэ тихъызмэтшIапIэхэм Iоф ашIэнымкIэ, хэхъоныгъэхэр ашIынхэмкIэ иIахьышIу хэлъ. Форумыр Адыгеим зэрэщыкIорэм шIуагъэ къызэритыщтым щэч хэлъэп. — къыщеIо джэпсалъэм.
Мыекъопэ къэралыгъо технологическэ университетым иректорэу Къуижъ Саидэ «Умный маршрут. Агротехнологии будущего»» зыфиIорэм хэлажьэхэрэм шIуфэс къарихыгъ.
Технологическэ предпринимательствэмкIэ студентхэм апае системэ гъэнэфагъэ зыгъэпсыгъэ апэрэ университетхэм МКъТУ-р зэращыщыр къыIуагъ. Ащ ишIуагъэкIэ «Студенческий стартап» зыфиIорэ зэнэкъокъум студенти 6-мэ текIоныгъэр къыщыдахыгъ ыкIи ябизнес-проектхэр щыIэныгъэм щыпхыращынхэм фэшI миллион зырыз къафагъэшъошагъ.
АР-м мэкъу-мэщымкIэ и Министерствэ иотдел ипащэу Шъэожъ Абрек тишъолъыр Iоф щызышIэрэ хэхъоныгъэхэр зэрашIыхэрэр ыкIи ащ мэхьанэ ин зэриIэр къыIуагъ.
Форумым ипрограммэ лекциеу «Фермер будущего» зыфиIорэмкIэ аублагъ. Элеонора Добровольскаям мэкъумэщ системэм зэхъокIыныгъэу фэхъухэрэм ягугъу къышIыгъ. Джащ фэдэу платформэу «Я в Агро» зыфиIорэм ныбжьыкIэхэр нэIуасэ фишIыгъэх. Агропромышленнэ комплексым ылъэныкъокIэ шIэныгъэ зыщарагъэгъотырэ чIыпIэхэр, сэнэхьатэу епхыгъэхэр, курсхэр, стажировкэхэр зыщакIухэрэм къатегущыIагъ.
Мэкъу мэщым ылъэныкъокIэ хэхъоныгъэхэр ашIынхэм фэшI шIэгъэн фаехэм, ащкIэ проектэу щыIэхэм афэгъэхьыгъэу экспертхэр къэгущыIагъэх.
Сурэтхэр Iэшъынэ Аслъан тырихыгъэх.