Урысыем и Президентэу Владимир Путиным шэкIогъум иапэрэ мафэ правительствэм фишIыгъэ унашъом къыщеIо илъэс псаум зэпымыоу Iоф зышIэщт хы курортхэу хэгъэгум щагъэпсыщтхэм афэгъэхьыгъэ проектхэр къагъэхьазырынхэу.
2025-рэ илъэсым нэс ягъэпсын къаухыщт. Анахьэу В. Путиным къыхигъэщыгъэр зыгъэпсэфыпIэхэр зыщагъэпсыщтхэ чIыпIэхэм якъыхэхын, ахэр илъэсым нэбгырэ миллиони 10-м къыщымыкIэу зыщагъэпсэфыным зэрэтегъэпсыхьэгъэнхэ фаехэр ары. Лъэныкъо пстэумкIи фэIо-фашIэхэр агъэцакIэхэу, бассейнхэм псы фабэ арытэу, нэмыкI зыгъэпсэфыпIэ чIыпIэхэр ахэтхэу зэрашIыщтхэм анаIэ атырыригъэдзагъ.
ЗыгъэпсэфыпIэхэр уахътэм диштэхэу гъэпсыгъэнхэм пае проектнэ компание инхэу анахь курорт зэтегъэпсыхьагъэхэм япроектхэр зышIыгъэхэр къырагъэблэгъэнхэу Президентым къариIуагъ.
Унашъоу къышIыгъэр гъэтхэпэ мазэм нэс агъэцэкIэнэу щыт.
Джащ фэдэу 2023 — 2025-рэ илъэсхэм атегъэпсыхьэгъэщт зекIо кешбэкым тырагъэкIодэщт ахъщэм хагъэхъощтыр зыфэдизыщтыр пэшIорыгъэшъэу, тыгъэгъазэм иапэрэ мафэ нэс, къагъэнэфэнэу къяджагъ.
Хы ШIуцIэ, Балтийскэ, Каспийскэ, Азовскэ хыхэм, Приморьем федеральнэ мэхьанэ зиIэщт зыгъэпсэфыпIэ инхэр ащашIыхэмэ лъэшэу яшIуагъэ къызэрэкIощтыр къэралыгъом ипащэ мыщ ыпэкIи къыхигъэщыгъагъ.
Урысыем итуроператорхэм я Ассоциацие макъэ къызэригъэIугъэмкIэ, мыгъэ хы ШIуцIэ Iушъом, Балтикэм ыкIи курортэу «Кавказские минеральные воды» зыфиIорэм нэбгырэ миллион 13-мэ защагъэпсэфыгъ.