КъушъхьэкъечъэхыпIэхэр зэрапхыщтых

Вице-премьерэу Дмитрий Чернышенкэм иаппарат къызэритыгъэмкIэ, зыгъэпсэфыпIэхэу «Лэгъонакъэ», «Шъачэ» ыкIи «Архъыз» зэзыпхыщтхэ автомобиль гъогум игъэпсын иIофыгъо министрэхэм я Кабинет хэплъэ.

Д. Чернышенкэм мы лъэхъа­ным къушъхьэкъечъэхыпитIу Кавказым зэрэщашIырэр цIыфхэм агу къыгъэкIыжьыгъ. Ахэр «Лэгъонакъэрэ» «Роза Хуторым» ыбгъукIэ щагъэпсырэ «Псыхъо кIэеу Васта» зыфи­Iорэмрэ.

— ЗыгъэпсэфыпIэхэр автомобиль гъогу занкIэкIэ зэпхыгъэ зыхъухэкIэ, зекIон хъыз­мэтым Урысыем и Къыблэ шъолъыр нахь псынкIэу зы­щиушъом­бгъущт, ахэм Адыгеири ахэтыщт, — къы­Iуагъ Д. Чернышенкэм.

Автомобиль гъогум фэшъхьа­фэу Шъачэ икъушъхьэ зыгъэпсэфыпIэ къыщегъэжьагъэу Къэрэщэе-Щэрджэс Республикэм нэсэу мэшIоку гъогу ашIыщт. Зыфежьэгъэхэ Iофыгъохэр гъэ­цэкIагъэхэ зыхъукIэ, субъектхэм ясоциальнэ ыкIи экономическэ щыIакIэ хэпшIыкIэу зыкъызэриIэтыщтыр Д. Чернышенкэм къыхигъэщыгъ. ЦIыфхэм Iоф­шIапIэхэр агъотыщтых, бизнес цIыкIумрэ гурытымрэ къахэ­хъощт.

Вице-премьерым иаппарат къызэрэщаIуагъэмкIэ, гъогу картэр тыгъэгъэзэ мазэм нэс къагъэхьазырыщт.

Шъаукъо Аслъангуащ.