Коронавирусыр уз псынкIэу щытэп

Псауныгъэр къэухъумэгъэнымкIэ Дунэе организацием илIыкIоу Урысыем щыIэ Мелита Вуйнович къызэриIуа­гъэмкIэ, коронавирусыр илъэсым иохътэ гъэнэфагъэ къы­дежьэрэ зэпахырэ узэу хъугъэ пIоныр пэсаIо.

— Мыр уз псынкIэу цIыфхэм алъытэн ылъэ­кIыщт. Ау арэущтэу щытэп. Ковидыр уахътэм къыде­жьэрэ узэу тлъытэн тлъэ­кIыщтэп, сыда пIомэ мыр джыри пандемие едзы-­
гъом хэт. Ау ыпэкIэ зэрэщытыгъэм фэдэу хьылъэу апэкIэкIырэп. Ар зэпхыгъэр иммунитет тиIэ зэ­рэ­хъугъэр ары. Арышъ, коронавирусыр гриппым фэдэу охътэ гъэнэфагъэм къежьэрэ узэу плъытэнэу щытэп, — къыIуагъ Мелита Вуйнович.

АР-м псауныгъэр къэу­хъумэгъэнымкIэ и Министерствэ къызэритыгъэмкIэ, коронавирусыр джыри тыухыгъэп, ар къызэузыхэрэм япчъагъэ нахьыбэ мэхъу. ЦIыфым ииммунитет пытэным фэшI коронавирусым пэуцу­жьырэ вакцинэр игъом зыхядгъэлъхьан фае.

Ведомствэм къызэрэщытаIуагъэмкIэ, шэкIогъум и 7-м ехъулIэу илъэс 18 зыныбжьхэм къащегъэ­жьагъэу ахалъхьэмэ хъу­нэу вакцинэ дозэ 300568-рэ республикэм къыIэкIэ­хьагъ. Джащ фэдэу илъэс 12 — 17 зыныбжьхэм апае вакцинэу «ГамКовид­Вак М» зыфиIорэм фэдэу зэхэлъхьэгъу 2020-рэ къэ­кIуагъ. Мы уахътэм ехъу­лIэу кIэлэцIыкIу 537-мэ ар ахалъхьагъ.

Адыгэ Республикэм щыпсэухэрэм янахьыбэр иммунизацием къыхиубы­тэнхэм фэшI муниципальнэ образованиехэм ащыIэ медицинэ организациехэм вакцинэр зыщахалъхьэрэ чIыпIэ 30 къащызэIуахыгъ.

Нэбгырэ 288742-рэ им­мунизацием къыхиубытэн фаеу агъэнэфагъ. Зэхэугъоягъэхэу IофшIэпIэ чIыпIэхэм ыкIи унэхэм кIохэзэ вакцинациер зышIыщтхэ мобильнэ бригади 9 зэхащагъ.

ИщыкIагъэ зыхъукIэ, цIыфхэу пэIудзыгъэ чIыпIэхэм ащыпсэухэрэр со­циальнэ ухъумэнымкIэ гупчэхэм ятранспорткIэ вакцинацие зыщашIырэ чIыпIэхэм аращалIэх.

ШэкIогъум и 7-м ехъу­лIэу коронавирусым пэуцужьырэ вакцинэм иапэрэ Iахь нэбгырэ 243748-мэ ахалъхьагъ, зыфашIын фаеу щыт пчъагъэм ипроцент 84,41-рэ ар мэхъу.

Шъугу къэдгъэкIыжьын коронавирусым готэу гриппыр ыкIи пэтхъу-Iутхъур тищыIэныгъэ зэрэхэт­хэр. Ахэм апэуцужьырэ вакцинэри икъоу респуб­ликэм къыIэкIэхьагъ, вакцинациер зыщашIырэ чIыпIэ пстэуми гриппым пэуцужьырэри фаехэм зэкIэми ащагъотыщт.

ЩэфакIохэм яфитыныгъэхэр ыкIи цIыфым игу­псэфыныгъэ къэухъумэ­гъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм къызэритыгъэмкIэ, 2022-рэ илъэсым ия 44-рэ тхьамафэу икIыгъэм пэтхъу-Iутхъур (ОРВИ) нэ­бгырэ 816-мэ къяузыгъэу агъэунэфыгъ. А пчъагъэм къызэригъэлъэгъуагъэмкIэ, нэбгырэ мини 10-м те­лъытагъэу сымэджагъэ­хэр процент 17,6-рэ мэхъу. Ар эпидемием ишапхъэу агъэнэфагъэм процент 44,6-кIэ, тхьамафэм къыкIоцI сымаджэ хъу­гъэхэм япчъа­гъэу эпидемие щыIэу зыщалъытэрэм ар процент 20,7-кIэ нахь макI.

Зэпахырэ узхэм алъэныкъокIэ республикэм эпидемиологие Iофхэм язытет шапхъэхэм ащышIо­кIырэп.

Iэшъынэ Сусан.