Зэкъошхэм ямедальхэр

Урысые Федерацием дзюдомкIэ изэнэкъокъу чъэпыогъум и 31-м — шэкIогъум и 4-м Екате­ринбург щыкIуагъ.

Къыблэ шъолъырым ихэшыпыкIыгъэ командэ хэтхэу Адыгэ Республикэм ибэнакIохэр шъхьэзэкъо зэнэкъокъухэм ыкIи коман­дэхэм язэIукIэгъухэм ахэлэжьагъэх.

Москва ихэшыпыкIыгъэ командэ апэрэ чIыпIэр къыдихыгъ, Санкт-Петербург зыщызыгъасэхэрэм ятIонэрэ чIыпIэр афагъэшъошагъ. Къыблэм, Урал якомандэхэм ящэнэрэ чIыпIэхэр къахьыгъэх, Адыгеим щыщ бэнэкIуищмэ джэрз медальхэр къафагъэшъошагъэх.

Мыгу Миланэ, кг 70-рэ, Датхъужъ Алый, кг 90-рэ, Бэгъ Ас­лъан, кг 90-рэ, командэм фэба­нэхи, ящэнэрэ чIыпIэхэр къа­хьыгъэх. Урысыем изаслуженнэ тренерэу Беданэкъо Байзэт, тре­нерэу Мерэм Саидэ агъасэ нарт пшъашъэу Мыгу Миланэ. Адыгэ Республикэм изаслуженнэ тренерэу Беданэкъо Рэмэзан япащ тибэнакIохэу Датхъужъ Алыйрэ Бэгъ Аслъанрэ.

Шъхьэзэкъо зэнэкъокъухэм ти­бэнакIохэр ахэлэжьагъэх, ау медальхэр къыдэзыхыгъэхэм ахэ­фагъэхэп.

Ткъош Къэбэртэе-Бэлъкъарым дзюдомкIэ ибэнакIоу Шэуджэн Ислъам дышъэ медалыр Екатеринбург къыщыдихыгъ. ТIуапсэ испорт еджапIэ зыщызыгъасэхэу Нэгъуцу Абрек, кг 66-рэ, апэрэ чIыпIэр, Ацумыжъ Казбек, кг 73-рэ, тыжьын медалыр къыдахы­гъэх.

Урысыем дзюдомкIэ ихэшы­пыкIыгъэ командэ итренер шъхьа­Iэу, Мыекъопэ бэнэпIэ еджапIэм щапIугъэу, Урысыем изаслуженнэ тренерэу Тао Хьасанбый медальхэр къыдэзыхыгъэ командэхэм афэгушIуагъ, шIухьафтынхэр аритыжьыгъэх.