Лъэпкъ зыкIыныгъэм и Мафэ фэгъэхьыгъэ мэфэкI зэхахьэхэр Адыгэ Республикэм икъалэхэм, ирайонхэм ащыкIуагъэх.
Мыекъуапэ ипчэгоу Зэкъошныгъэм щызэхащэгъэ зэхахьэм АР-м и Правительствэ, Парламентым, республикэм икъэлэ шъхьаIэ иадминистрацие якъулыкъушIэхэр, общественнэ движениехэм ялIыкIохэр, ветеранхэр, культурэм иIофышIэхэр, ныбжьыкIэхэр, еджакIохэр, хьакIэхэр, нэмыкIхэри хэлэжьагъэх.
Адыгэ Республикэм и ЛIышъхьэу КъумпIыл Мурат ыцIэкIэ мэфэкIым хэлажьэхэрэм къафэгушIуагъ Адыгеим и Къэралыгъо Совет — Хасэм и Тхьаматэу Владимир Нарожнэр.
— МэфэкIым цIыфхэм язэгурыIоныгъэ къегъэлъагъо, зэфещэх. Лъэпкъыбэ зыщыпсэурэ Урысыем икъэралыгъо гъэпсыкIэ зыгъэпытагъэхэ тинахьыжъ лъапIэхэм шъхьащэ непэ афэтэшIы. БлэкIыгъэ илъэсхэр тыгу къэдгъэкIыжьыхэзэ, къинэу зэпытчыгъэхэм, тапэкIэ тызэрэлъыкIотэщтым тягупшысэ. Лъэпкъхэм яшIоигъоныгъэхэр къэухъумэгъэнхэм фэшI зэгурыIоныгъэрэ зыкIыныгъэрэ зэрэтхэлъхэм мэхьэнэ ин ятэты, тигушъхьэ кIуачIэ зэдэдгъэпытэзэ нахьышIу щыIакIэм тыфэкIо, — къыIуагъ Владимир Нарожнэм.
АР-м и Парламент и Тхьаматэ игуадзэу Цэй Эдуард зэхахьэм хэлажьэхэрэм къафэгушIуагъ. Урысыер ыпэкIэ лъыкIотэным тыхэлажьэзэ тизыкIыныгъэ зэрэпытэрэр хигъэунэфыкIыгъ.
Къэгъэлъэгъонхэр
Республикэм иобщественнэ движениехэм ялъэпкъ творчествэ фэгъэхьыгъэ къэгъэлъэгъонхэр Зэкъошныгъэм ипчэгу къыщызэIуахыгъэх, нэрылъэгъу IэпыIэгъухэр дахэу агъэпсыгъэх.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет якIэщакIоу къэгъэлъэгъонхэр зэхащагъэх.
Адыгэ шхыныгъохэр мэфэкIым хэлажьэхэрэм лъэшэу агу рихьыгъэх. Урысыем щыпсэурэ ермэлхэм я Союз, къэндзалхэм якультурнэ обществэу «Дуслыкым», АР-м щыпсэурэ азербайджанхэм яобщинэ, «УФ-м инароднэ фронт», Адыгэ Республикэм илъэпкъ Iэпэщысэхэм якъэгъэлъэгъон пылъхэм, фэшъхьафхэм ятворчествэ зэхахьэм щытлъэгъугъ.
Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан Адыгеим щыпсэурэ лъэпкъхэм ядвижениехэм япащэхэм ахэтэу къытиIуагъ мэфэкIым хэлажьэхэрэм лъэпкъ шэн-хабзэхэр дэгъоу зэрахьанхэм зэрэфэхьазырхэр. Искусствэм зэфищэгъэ лъэпкъхэм языкIыныгъэ мэфэкIым зэрэщыпытэрэр «Дуслыкым» ипащэу Алим Ильясовым къыхигъэщыгъ.
Хьасанэкъо Хьамедэрэ ЛIышэ Ахьмэдрэ Адыгэ Хасэм хэтых, лъэпкъ IэпэIасэх. Пкъыгъоу ашIыгъэхэр мэфэкIым къыщагъэлъэгъуагъэх, «IэпэIасэм иегъэджэн» зыфиIорэр зэхащагъ. Нэгэрэкъо Казбек къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ IэшIагъэхэм IупкIэу къатегущыIагъ.
Къэндзалхэм, ермэлхэм, къэзэкъхэм, азербайджанхэм, урысхэм, адыгэхэм, нэмыкIхэм ялъэпкъ къэгъэлъэгъонхэр гум къегущыIыкIых. Зым зыр еупчIыжьызэ, ятворчествэ нахьышIоу къызэIуахы.
Концертыр
Адыгэ Республикэм и Лъэпкъ театрэ, АР-м и Къэралыгъо филармоние, АР-м и Къэралыгъо камернэ музыкальнэ театрэу А. Хьанэхъум ыцIэ зыхьырэр, культурэм и Унэу «Гигантыр», кIэлэцIыкIу ансамблэхэр республикэм имэфэкI зэхахьэхэм ахэлэжьагъэх.
Ансамблэу «Ошъутенэм» иартистхэм лъэпкъым, патриотическэ пIуныгъэм афэгъэхьыгъэ орэдхэр къаIуагъэх. Адыгэ Республикэм изаслуженнэ артисткэу Даутэ Сусанэ шIэжь орэдыр мэкъэ хэхыгъэкIэ къыхидзагъ. ОрэдыIохэу Анастасия Истамуловам, Сергей Трутневым, Аванес Погосян, Вадим Хабибулиным, нэмыкIхэм Урысыем, Адыгеим яхьылIэгъэ орэдхэр къаIуагъэх. Хъурэнэ Азэ адыгабзэкIэ кIыригъэщыгъэ шIулъэгъу орэдыр гум рихьыгъ.
КIэлэцIыкIу ансамблэхэу «Шпаргалкэм», «Радугэм», фэшъхьафхэм уяплъынкIэ гъэшIэгъоныгъэх.
Адыгэ къашъохэмкIэ ансамблэу «Абрекхэм» мэфэкI зэхахьэр къыгъэдэхагъ. Художественнэ пащэу ТхьакIумэщэ Налбек лъэпкъ къашъоу ыгъэуцугъэхэр ныбжьыкIэхэм дахэу къашIыгъэх.
ЗыкIыныгъэм и Мафэ фэгъэхьыгъэ спорт зэнэкъокъухэр, зэIукIэгъухэр Адыгэ Республикэм щыкIуагъэх. Мыекъуапэ футболымкIэ, фэшъхьаф спорт лъэпкъхэмкIэ зэIукIэгъухэр щызэхащагъэх.
«Единэ Россием и НыбжьыкIэ гвардие» Мыекъуапэ зэIукIэгъу гъэшIэгъон щызэхищагъ. «НыбжьыкIэ гвардием» ишъолъыр къутамэ ипащэу Бэрзэдж Асет зэхахьэм хэлажьэхэрэм къафэгушIуагъ. Урысыем ибыракъ зытешIыхьэгъэ лентэхэр ныбжьыкIэхэм агъэбыбэтагъэх.
Адыгеим щыщ спортсменхэр Урысыем изэнэкъокъухэм ахэлэжьагъэх. ДзюдомкIэ тибэнакIохэу Мыгу Миланэ, Датхъужъ Алый, Бэгъ Аслъан Къыблэм ихэшыпыкIыгъэ командэ хэтхэу ящэнэрэ чIыпIэхэр къахьыгъэх.
МэфэкI зэхахьэхэр цIыфхэм шIукIэ агу къинэжьыщтых.
ЕмтIылъ Нурбый.