Муниципальнэ тхылъеджэпIэ анахь дэгъур

2022-рэ илъэсымкIэ анахь дэгъоу зыцIэ къыраIуагъэр Прикубанскэ чIыпIэ тхылъеджапIэр ары. Ащ республикэ зэнэкъокъоу «2022-рэ илъэсымкIэ муниципальнэ тхылъеджэпIэ анахь дэгъу» зыфиIорэм текIоныгъэр къыщыдихыгъ. Ар жъоныгъуакIэм щегъэжьагъэу чъэпыогъум нэс кIуагъэ.

Мы илъэсым зэнэкъокъум муниципальнэ тхылъеджэпIи 9 хэлэжьагъ. Ахэр щагъэшIуагъэх текIоныгъэр къыдэзыхыгъэ Прикубанскэ къоджэ муниципальнэ тхылъеджапIэм. Шъугу къэтэгъэ­кIыжьы, ар псэупIэу Прикубанскэм дэт къоджэ культурэм и Унэ зэрэхэтыр, 2021-рэ илъэсым лъэпкъ проектэу «Культура» зыфиIорэм къыды­хэ­лъы­тагъэу мыщ гъэцэкIэжьынхэр щыкIуагъэх, джырэ уахътэ цIыфхэм языгъэпсэфыпIэ гупч. ТхылъеджапIэми мы охътэ благъэм «модельнэ» шапхъэр иIэ хъущт.

АР-м и Лъэпкъ тхылъеджапIэ идиректорэу, зэнэкъокъумкIэ комиссием ипэщагъэу, УФ-м культурэмкIэ изаслуженнэ Iофы­шIэу Б. А. Къыкъым къызэри­IуагъэмкIэ, зэнэкъокъум имурад зэшIуихыгъ.

А I-рэ шъуашэ зиIэ дипломыр ыкIи ахъщэ шIухьафтынэу сомэ мин 42000-р зэрыт сертификатыр фагъэшъошагъ Прикубанскэ чIыпIэ (къоджэ) тхылъеджапIэм (ащ ипащэр Лариса Лукшина).

Я II-рэ шъуашэ зиIэ дипломыр ыкIи ахъщэ шIухьафтынэу сомэ мин 37-рэ фагъэшъошагъ къалэу Мыекъуапэ имуниципальнэ тхылъеджапIэу N 5-м (пащэр Гощэгъэгъ Гришинар).

Я III-рэ шъуашэ зиIэ дипломыр ыкIи сомэ 31370-рэ къы­лэжьыгъ Мыекъопэ районымкIэ Абадзехскэ къоджэ тхылъеджапIэм (пащэр Наталья Поляшенко).

Культурэм ипрофсоюз Iофы­шIэхэм я Адыгэ республикэ организацие ыцIэкIэ Шэуджэн районым и Заревскэ чIыпIэ тхылъеджапIэу N 12-м ипащэу Любовь Шарповар ахъщэ шIухьафтынкIэ къыхагъэщыгъ.

Зэнэкъокъум дипломхэмкIэ щыхагъэунэфыкIыгъэх Большесидоровскэ къоджэ тхылъеджапIэу N 4-р (библиотекарыр – Светлана Гулак), Гончарскэ къоджэ тхылъеджапIэу N 10-р (пащэр Татьяна Никулинар), Заревскэ къоджэ тхылъеджапIэу N 12-р (пащэр Любовь Шарповар), Игнатьевскэ къоджэ тхылъеджапIэу N 5-р (пащэр Олеся Нечиталенкэр), Псэкъупс къоджэ тхылъеджапIэу N 3-р (библиотекарыр НапцIэкъо Симм) ыкIи Шевченкэ къоджэ тхылъеджапIэу N 12-р (пащэр КIыкI Эмм).
(Тикорр.).