Адыгеим иапэрэ Президент тыфэгушIо!

Джарымэ Аслъан ыцIэ адыгэ лъэпкъэу къэралыгъуагъэ иIэным лIэшIэгъу пчъагъэм кIэхъо­псыщтыгъэр Краснодар краим къызэрэхэкIыжьыгъэм епхыгъэ хъугъэ. ЦIыф пэрытхэр ащ зыщыфэбанэщтыгъэхэ уахътэм Адыгэ автоном хэкум пэщэныгъэр дызэрихьанэу техьэгъагъ. Нэужым нафэ зэрэхъугъэмкIэ, а уахътэм ищыкIэгъэ цIыфэу ар къычIэкIыгъ, хэку цIыкIум ежьыри икоманди кIэгъэкъонышхо фэ­хъугъэх.


Аслъан Алый ыкъом итетыгъом Iофышхоу зэшIохыгъэ хъугъэхэм ащыщ тилъэпкъэгъоу IэкIыбым щыпсэухэрэм ащыщхэр ячIыгужъ къызэращэжьыгъэхэр. Ар къэралыгъо Iоф ышIыгъагъ. А лъэхъаныр ары УФ-м и МИД хэушъхьафыкIыгъэ лIыкIохэм Iоф щашIэу зырагъэжьэгъагъэр. 1997-рэ илъэсым АР-м и Законэу репатриантхэм афэгъэ­хьыгъэр аштэгъагъ. Джащыгъум апэрэу купышхо хъурэ адыгэхэр зэо-зэпэуцужь къызщежьэгъэ Косово къыращыжьхи, Адыгеим къащэжьыгъагъэх.

Джарымэ Аслъан цIыфхэм цыхьэ фашIи зыуж иуцогъэхэ пащ. 1993-рэ илъэсым къы­щегъэжьагъэу 2002-м нэс ар АР-м и Президентыгъ. Ащ ыуж дипломатическэ IофшIэныр Болгарием щигъэцэкIагъ — ­къалэу Варнэ Генеральнэ консулэу Iоф щи­шIагъ.

Тыгъуасэ, шэкIогъум и 7-м, Джарымэ Аслъан Алый ыкъом ыныбжь илъэс 83-рэ хъугъэ. АР-м и ЛIышъхьэу КъумпIыл Мурат ителеграм нэкIубгъо ар къыщыхигъэщыгъ.

— Аслъан Алый ыкъор Адыгеим республикэ статус иIэным, гъэIорышIэным иинститут щыгъэпсыгъэным, шъолъырым хэ­хъоныгъэхэр езгъэшIыщт лъэ­ныкъохэр гъэпсыгъэнхэр якъе­жьапIэ Iутыгъ.

Илъэсэу ар тишъолъыр зыщипэщагъэхэм Кавказым мамырныгъэрэ зэгурыIоныгъэрэ илъыным, ткъош лъэпкъхэм зэпэблэгъэ зэфыщытыкIэу адытиIэм зиушъомбгъуным, IэкIыбым щыпсэурэ тилъэпкъэгъухэм зэпхыныгъэ адэшIыгъэным афы­тегъэпсыхьагъэу ышIагъэр бэдэд. Тилъэпкъэгъухэр апэрэу купышхо хъоу зэо-зэпэуцужь къызщежьэгъэ Косово къыращыжьхи Адыгеим къызэращэ­жьыгъагъэхэм, Грузиемрэ Абхъаз Республикэмрэ азыфагу къитэджэгъэ бырсырыр зэрэIэсэжьыгъэм, нэмыкI хъугъэ-шIагъэу республикэм имызакъоу, хэгъэгум зэрэщытэу ищыIэныгъэ къыхэхьэгъагъэхэм Адыгеим иапэрэ Президент ыцIэ япхыгъ.

Аслъан Алый ыкъом тиреспуб­ликэ гупсэ, ащ цIыфэу исхэм апае шIуагъэ къытэу илъэсыбэ Iофэу ышIагъэм пае «тхьауе­гъэпсэу» есIомэ сшIоигъу. Псау­ныгъэ пытэрэ щыIэкIэшIурэ иIэнхэу, джыри илъэсыбэ къыгъэшIэнэу сыфэлъаIо! — къытхыгъ КъумпIыл Мурат.

Аслъан Алый ыкъом имэфэкIкIэ тэри тыфэгушIо, игухэлъ­хэр зэкIэ ежьыри, игупсэхэми къадэхъунэу тыфэлъаIо!