Лъэпкъхэм языкIыныгъэ и Мафэ ипэгъокIэу культурэм иучреждениехэм Iофтхьэбзэ гъэшIэгъоныбэ, культурэмрэ гъэсэныгъэмрэ япхыгъэ проектыбэ зэхагъэуцуагъ. Социальнэ программэу «Пушкинская карта» зыфиIорэм къызэрэдилъытэрэм тетэу ныбжьыкIэхэм амал яIэщт ахэм яплъынхэу.
Республикэм щыпсэурэ ныбжьыкIэхэм а проектым уасэ фашIыгъах. «Пушкинскэ картэм» кIуачIэ иIэ зыхъугъэм къыщыублагъэу ащ фэдэ картэ мин 18 агъэпсыгъ, программэм къыдыхэлъытагъэу билет мин 28-м ехъу аIэкIагъэхьагъ.
Адыгеим и ЛIышъхьэу КъумпIыл Мурат социальнэ сетьхэмкIэ агу къыгъэкIыжьыгъ хэгъэгум и Президентэу Владимир Путиным игукъэкIыкIэ 2021-рэ илъэсым Iоныгъом и 1-м къыщыублагъэу проектэу «Пушкинская карта» зыфиIорэм Урысыем кIуачIэ щыриIэ зэрэхъугъэр. Илъэсым къыкIоцI картэмкIэ сомэ мини 5 зытефэщт Iофтхьэбзэ зэфэшъхьафхэм защыбгъэгъозэн плъэкIыщт. СурэткъэгъэлъэгъуапIэхэм, спектаклэхэм ыкIи культурэм епхыгъэ нэмыкI хъугъэ-шIагъэхэм нэIуасэ уафэхъун плъэкIыщт. Республикэм культурэмкIэ иучреждениехэр зэкIэ проектым къыхэлажьэх пIоми хъущт. Спектаклэхэм, концертхэм, сурэткъэгъэлъэгъуапIэхэм ыкIи кинохэр къызщагъэлъэгъорэ чIыпIэхэм цIыфыкIэхэм ахэр нэIуасэ ащыфэхъунхэ алъэкIыщт.
«Къэралыгъом къаритыгъэ амал гъэшIэгъоныр тиреспубликэ щыпсэурэ ныбжьыкIабэхэм къызэрэзыфагъэфедэщтым сицыхьэ телъ, мэфэкI ыкIи гъэпсэфыгъо мафэхэр гъэшIэгъонэу ыкIи федэ хэлъэу ахэм агъэкIощтых», — къытхыгъ Адыгеим и ЛIышъхьэ.
Адыгеим щыпсэурэ ныбжьыкIэхэм картэмкIэ билетэу къащэфыхэрэр хэгъэгум инэмыкI шъолъырхэми ащызэхащэрэ IофтхьабзэхэмкIэ къызфагъэфедэнхэ амал яI. Репертуарыр зэрэпсаоу порталэу «Культура. РФ» зыфиIорэм ыкIи гуадзэу «Къэралыгъо фэIо-фашIэхэр. Культурэр» зыфиIорэм арагъотэн алъэкIыщт.