ИшIушIагъэ цIыфхэм ащыгъупшэщтэп

Iахьзэхэлъ обществэу «Дондуковский элева­тор» зыфиIорэм ипэщагъэу, АР-м и Къэра­лыгъо Совет — Хасэм идепутатыгъэу Болэ­къо Мыхьамэт Адам ыкъор къызытхэмы­ты­жьыр чъэпыогъум и 25-м илъэс хъугъэ. Къызыщыхъугъэ къуаджэми, районми, республикэми чIэнэгъэ ин ашIыгъ. ШIушIагъэу ащ иIэр цIыфхэм ащыгъупшэщтэп.

Мыхьамэт республикэм иагропромышленнэ комплекс изе­гъэушъом­бгъун, иэкономикэ зы­къегъэIэтыгъэным иIа­хьышхо ахишIыхьагъ. Ар IофшIэкIошхоу, пэщэ чанэу щытыгъ, цIыфхэм, Iоф зыдишIэхэрэм ренэу афэгумэкIыщтыгъ. ГукIэгъу хэлъэу, гупыкI иIэу игъашIэ къыхьыгъ.

ЖъоныгъуакIэм и 20-м, 1960-рэ илъэсым Мыхьамэт Адам ыкъор Кощхьэблэ районым икъуаджэу Блащэпсынэ къыщыхъугъ. Сабыибэ зыщапIурэ мэкъумэщышIэ унагъо къихъу­хьагъ. ЕджэпIэ ужым къулыкъу ыхьыгъ, Бутурлиновскэ механико-технологическэ техникумым, Пшызэ къэралыгъо технологическэ университетым ащеджагъ.

Болэкъо Мыхьамэт щыIэныгъэ гъогу дахэ къыкIугъ. Дондуковскэ элеваторым 1986-рэ илъэсым мастерэу Iоф щишIэнэу щыригъэжьэгъагъ. Зыпылъ лъэ­ныкъор шIу зэрилъэгъурэм, ащ ыкIуачIэ зэрэхилъхьэрэм къы­хэкIыкIэ лъэгэпIэ инхэм анэсын ылъэкIыгъ. 1994-рэ илъэсым къыщегъэжьагъэу элеваторым игенеральнэ пащэу Iоф ышIагъ.

Непэ «Дондуковский элеваторыр» республикэмкIэ анахь гъэхъэгъэ ин зиIэхэм ащыщ, ар зиIахьышIур Болэкъо Мыхьамэт ары. Пащэм ишIуагъэкIэ предприятиер къызэтенэгъэ закъоп, ащ иIофшIэн хигъахъозэ лъэхъа­ным диштэрэ хъызмэтшIапIэ хъугъэ. Щылажьэхэрэр зы уна­гъо фэдэу зэдэ­псэух. Мыхьамэт нэбгырэ пэпчъ ыцIэ ышIэу, зыфэныкъом щыгъуазэу щытыгъ, социальнэ IэпыIэгъу ари­гъэ­кIыщтыгъ.

Илъэс 27-рэ «Дондуковскэ элеваторым» ипэщагъ. Предприятием чIыгу гектар мин пчъагъэ джы елэжьы. Гъэхъагъэ хэлъэу коцыр, бжыхьэсэ рапсыр, натрыфыр, соер, тыгъэгъазэр, хьэр, джащ фэдэу пэрыт технологиехэр агъэфедэхэзэ чылапхъэхэр къагъэкIых. Шъхьалым Iоф ешIэ, хьалыгъу лъэпкъ зэмылIэужыгъохэр къыдагъэкIы ыкIи тыгъэгъэзэ дагъэ зыщашIырэ цех къыщызэIуахыгъ. Ежь лабораторие яIэу оборудова­ниякIэмкIэ фышъхьэ лэжьыгъэ­хэм язытет ауплъэкIу. Губгъо­лэжьыным зэрэпылъхэм дакIоу былымхэри аIыгъых.

Джэджэ районым идепутатхэм я Совет хэтэу, АР-м и Къэралыгъо Совет — Хасэм идепутатэу илъэс 15-рэ Болэкъо Мыхьамэт Iоф ышIагъ. ИчIы­пIэгъухэм яфедэхэм якъэгъэгъу­нэн ишъыпкъэу ар пылъыгъ, Iоф зыдишIэхэрэм шъхьэкIафэ къыфашIыщтыгъ, хэдзакIохэри сыдигъуи къыфэрэзагъэх. Мы­хьамэт ищы­Iэныгъэ зэрэщытэу игупсэ республикэ хэхъоныгъэ егъэшIыгъэным, ичIыпIэ­гъухэм ящыIэкIэ-псэукIэ зыкъе­гъэIэ­тыгъэным фигъэIорышIагъ. Тиреспуб­ликэ нахь зэтегъэ­псы­хьагъэ хъуным фэлэжьэгъэ цIыфэу ары зэкIэми ар агу къызэринэжьыгъэр.

— Ащ фэдэ цIыфэу дунаим тетыр макIэ, — аIо депутат корпусым дыхэтыгъэхэм. — Мыхьамэт Iушэу, рэхьатэу, гу­кIэгъушхо зыхэлъ хъулъфы­гъэу тыгу къинэжьыгъ. ИIофшIэн фэщагъэу, хэшIыкI ин фыриIэу, ихэгъэгу шIу ылъэгъоу, икъэралыгъо фэшъыпкъэу щытыгъ. ГукIэгъуныгъэу, шъып­къагъэу, цIыфхэм лыузэу афыриIэм къыхэкIыкIэ иIофшIэгъу­хэми, иныбджэгъухэми алъытэщтыгъ, цыхьэ къыфашIыщтыгъ. Илъэс хъугъэ Мыхьамэт Адам ыкъор къызытхэмытыжьыр, ау ар тщыгъуп­шагъэп ыкIи тщыгъупшэщтэп.

Болэкъо Мы­хьамэт пэ­щэ дэгъугъ, мэкъу-мэщым ылъэныкъокIэ специалист Iушыгъ ыкIи IэпыIэгъу зищыкIагъэхэм адеIэу, ыгу афэузэу щытыгъ. ЕджапIэхэм, кIэлэцIыкIу IыгъыпIэхэм, зигъот макIэхэм IэпыIэгъу афэхъущтыгъ, икъоджэ гупсэ, Iоф зыщишIэщтыгъэ станицэм, ирайон ит саугъэтхэм, зыгъэпсэфыпIэ чIыпIэхэм, культурэм иучреждениехэм, футбол ешIапIэхэм язэтегъэпсыхьан хэлэжьагъ. Джащ фэдэу ермэлыкъэу зэхащэхэрэм якIуалIэ зышIоигъохэм апае автобус тыригъэхьагъэу, Дондуковскэм щыпсэухэу, ащ кIон амал зимыIэхэр аригъащэхэти, къаригъэщэжьыщтыгъэх. Дондуковскэм ифутбольнэ командэу «Факелым» ищыкIагъэр зэкIэ ригъэгъотыщтыгъ. Чылысэу станицэм дэтым изэтегъэуцо­жьыни иIахьышIу хишIыхьагъ. Дин, цIыф зэхэдз Мыхьамэт ­иIагъэп.

Коронавирусым ыпкъ къи­кIыкIэ республикэр гумэкIыгъо зыхафэм цIыфхэм IэпыIэгъу афэ­хъугъэхэм ащыщыгъ Мы­хьамэт Адам ыкъор. Джэджэ районым ит сымэджэщым автомобилыкIэу «Соболь» зыфи­Iорэр фищэфыгъагъ. Псауныгъэр къэухъумэгъэным иIофы­шIэхэм IэпыIэгъу афэхъугъэным­кIэ зэхащэгъэ Iофтхьабзэхэм ча­нэу ахэлэ­жьагъ.

ЦIыфхэм IэпыIэгъу зэрафэ­хъугъэр щытхъугъэкIэ зыфи­лъэгъужьыщтыгъэп, ышIагъэр шIо­макIэу, джыри зэрэхигъэ­хъощтым пылъыгъ.

— Сянэ къылъфыгъэм фэдэу тызэфыщытыгъ. Мыхьамэт ыгу­кIэ къабзэу, цIыфхэм дахэу адэзекIоу щытыгъ. Ащ шIушIагъэу пылъыр уухынэу щытэп, къеолIагъэу ыгу зыфэмыузыгъэ, зыдемыIагъэ Адыгеим исэп пIоми ухэукъонэп. Исэнэхьат хэшIыкI ин фыриIэу щытыгъ. ЧIыгулэжьынымкIэ упчIэжьэгъоу тиIагъ. Илэжьыгъэ зыIуихыжьыкIэ IэпыIэгъу къысфэ­хъунэу икомбайнэхэр къыгъа­кIощтыгъ. ШIэныгъэу непэ тIэ­кIэлъыр зэкIэ тишъэогъу лъапI зэпхыгъэр, ары гъогу пэрытым тытезыщагъэр. ЦIыфыныгъэу, адыгагъэу хэлъыгъэр къызыщыхъугъэ къуаджэми, районми, илъэс пчъагъэрэ зыщылэжьэгъэ станицэми, республикэми ащыгъупшэщтэп, — еIо ишъэогъоу Хьаткъо Рэмэзан.

Илъэсыбэрэ гуетыныгъэ фыриIэу Iоф зэришIагъэм фэшI Болэкъо Мыхьамэт медалэу «Адыгеим и Щытхъузехь», ­Адыгэ Республикэм и Къэралыгъо Со­вет — Хасэм и Щытхъу тамыгъэу «Закон. Пшъэрылъ. ЦIыфыгъ», Урысые Федерацием и Федеральнэ ЗэIукIэ ФедерациемкIэ и Совет и Щытхъу тхылъ, щытхъуцIэхэу «Урысые Федерацием гъомылэпхъэшIынымкIэ изаслуженнэ IофышI», «Адыгэ Республикэм мэкъу-мэщымкIэ изаслуженнэ IофышI» зыфиIо­хэрэр къыфагъэшъошагъэх.

Болэкъо Мыхьамэт лъэуж да­хэу къыгъэнагъэм игугъу бэрэ цIыфхэм ашIыщт. Ишъхьэгъусэу Зареми, ипшъашъэхэу Марыет, Жанеттэ, Даринэ аригъэлъэгъу­гъэ гъогу дахэм тетхэу рыкIощтых, гъэсэпэтхыдэу, адыгагъэу, цIыфыгъэу ахилъхьагъэр ащыгъупшэщтэп.

ДЕЛЭКЪО Анет.