Зыгъэпсэфыгъо уахътэр аухыгъ

Чъэпыогъум иаужырэ мафэ Кавказ биосфернэ заповед­никым игъэмэфэ зекIо лъагъохэр зэкIэ зэфашIыжьыгъэх.

Пропускхэр къызщаратыщтыгъэ чIыпIэхэми Iоф ашIэжьырэп. Джы заповедникым хэбзэнчъэу къыхахьэхэрэм нахь алъыплъэщтых, къэуцупIэхэу, зыгъэпсэфыпIэхэу хэтхэр охътэ гъэнэфагъэкIэ зэфашIыжьыгъэх.

Заповедникым ипресс-къулыкъу макъэ къызэригъэIугъэмкIэ, гъэмэфэ зыгъэпсэфыгъо уахътэр блэкIыгъэ ­илъэсым егъэпшагъэмэ мыгъэ тхьа­мэфитIукIэ нахь кIыхьагъ. Ар къызхэ­кIыгъэр ом изытет ары, гъушъагъэ, фэбагъэ.

Джы чIыопсым зыкъызэблихъугъ. Метрэ 1200-рэ зилъэгэгъэ къушъхьэхэм чэщырэ къащигъэщтэу ригъэжьагъ. ЧIыпIэ-чIыпIэу къызщесыгъэхэри щыIэх. Ащ фэдэ мафэхэм къушъхьэ лъэгъо зэжъу­хэм къащыпкIухьаныр щынагъо.

Мэфэ заулэрэ къызщакIухьэщтыгъэ маршрутхэр зэфашIыжьыгъэхэми, зы мафэм телъытэгъэ экскурсиехэм илъэс псаум уахэлэжьэн плъэкIыщт. Адыгеим зекIо къакIохэрэм Кавказ заповедникым нэIуасэ зыфашIыщтмэ, экогупчэу «Гъо­зэрыплъэ» мафэ къэс къяжэщт.