Армением щызэIукIэщтых

Адыгеим ипредпринимательхэм ащыщхэр Армением рагъэблэгъагъэх. Лъэпкъ проектэу «Предпринимательствэ цIыкIумрэ гурытымрэ ыкIи унэе предпринимательствэм IэпыIэгъу фэхъугъэныр» зыфиIорэм ащ­кIэ ишIуагъэ къэкIуагъ.

Адыгэ Республикэм экспорт IэпыIэгъумкIэ и Гупчэ макъэ къызэригъэIугъэмкIэ, ахэр шэ­кIогъум и 8-м къыщегъэжьагъэу и 13-м нэс дунэе Iофтхьабзэу Армением щыкIощтым хэлэжьэщтых. КъызэраIуагъэмкIэ, ыпкIэ хэмылъэу ащ хэлэжьэнхэ зы­лъэкIыщтхэр мэкъумэщ хъызмэтым ыкIи гъогушIыным ащагъэ­федэрэ техникэм, гъомылап­хъэхэм якъыдэгъэкIын пылъхэр, энергетикэм, машинэшIыным, медицинэм япродукцие зыщэ­хэрэр арых.

Экспортерхэр Армением икъэ­ралыгъо структурэхэм ялIыкIохэм, республикэм икъулы­къушIэ зэфэшъхьафхэм, сатыушI агентхэм аIукIэнхэ алъэкIыщт.

Лъэпкъ проектэу зигугъу къэтшIыгъэм ипшъэрылъыр бизнесыр зэхэзыщэрэ пстэуми яшIоигъоныгъэхэр къызэрадэ­хъунхэу IофшIэныр зыщыра­гъа­жьэрэм къыщыублагъэу къа­шIырэ, къыдагъэкIырэ продукциер IэкIыб хэгъэгухэм аращэхэ охъуфэхэкIэ IэпыIэгъу афэхъугъэныр ары. Гупчэхэм ащкIэ яшIогъэшхо къагъакIо.

КIэлэеджэкIо 1500-рэ фэдизмэ загъэпсэфыщт

Мы илъэсыр имыкIызэ ыпкIэ хэмылъэу зыгъэпсэфакIо агъэ­кIощт кIэлэеджакIохэу Адыгеим исхэм япчъагъэ нэбгырэ минырэ ныкъорэм зэрэнэсыщтыр Адыгеим и ЛIышъхьэу КъумпIыл Мурат къыIуагъ. Мы Iофтхьабзэр зыгъэпсэфыгъо мафэхэм ателъытэгъэщт.

— Лъэпкъ проектэу «ЗекIонымрэ хьакIэпэгъокIынымкIэ индустриемрэ» зыфиIорэм апэу дезыгъэштагъэхэм тащыщ. ЗекIоным ренэу тынаIэ тет. Республикэм социальнэ ыкIи экономикэ хэхъоныгъэхэр егъэ­шIыгъэнхэмкIэ ащ инэу ишIуагъэ къызэрэкIощтым щэч хэ­лъэп, — къыIуагъ Адыгеим и ЛIышъхьэ.

Мы хъызмэтым зырагъэу­шъомбгъуным, уахътэм диштэрэ зекIон гупчэхэм Адыгеир ащыщ хъуным зэрэфэбанэхэрэр Къум­пIыл Мурат ренэу къыхегъэщы. Урысые Федерацием и Правительствэ амалэу къытыхэрэр зэкIэ шъолъырым щагъэфедэх.

Ащ фэшъхьафэу лъэпкъ проектым игъэцэкIэн пэIуагъэхьа­нэу республикэм сомэ миллиарди 6,2-рэ къыфыхагъэкIыгъ, ащкIэ экокурортэу «Лэгъонакъэ» иинженернэ ыкIи итранспортнэ инфраструктурэ агъэпсыщт.

2022-рэ илъэсым инфраструктурэм ишIын сомэ миллион 205-рэ тырагъэкIодэщт, къихьащт илъэсым сомэ миллиарди 5 фэдиз, 2025-м — зы миллиард IофшIэнхэм апэIуагъэхьащт.

Лъэпкъ проектым къыдыхэлъытэгъэ Iофтхьабзэхэр икъоу загъэцакIэхэкIэ, 2030-рэ илъэсым нэс УрысыемкIэ зекIохэм япчъагъэ (илъэсым телъытагъэу) нэбгырэ миллиони 140-м нэ­сыщт. КъэпкIухьаныр гъэшIэ­гъонэу, мыщынагъоу, гупсэфэу хъущт.