Мы мафэхэм автомобиль гъогоу «Дахъо — Лэгъо-Накъэ ибгы тешъу» зыфиIорэм сыхьатыр 11-м ыныкъохэм адэжь мотодельтаплан къыщефэхыгъ, ащ исыгъэ нэбгыритIур хэкIодагъ. 
АР-м ошIэ-дэмышIэ IофхэмкIэ и ГъэIорышIапIэ къызэритыгъэмкIэ, къэзыбыбыхьэрэ пкъыгъор къызефэхы нэуж машIор къыкIани стыгъэ. ПсынкIэу а чIыпIэм Мыекъопэ мэшIогъэкIосэ-къэгъэнэжьэкIо гарнизоным иоперативнэ куп къэсыгъ ыкIи машIор агъэкIосагъ.
УФ-м и Следственнэ комитет транспортымкIэ и Темыр шъолъыр следственнэ гъэIорышIапIэ и Следственнэ къулыкъу Адыгеим къыщыхъугъэ хъугъэ-шIагъэмкIэ уголовнэ Iоф къызэIуихыгъ.
Следствием зэригъэунэфыгъэмкIэ, мы тхьамыкIагъор зыщыхъугъэ мафэм дельтапланым ипилотэу (ежьыр ары зиер)1974-рэ илъэсым къэхъугъэм ыпкIэ хэлъэу ошъогум къащыригъэбыбыхьанэу зекIо купым зыфигъэзагъ. Ростов хэкум щыщ бзылъфыгъэу 1979-рэ илъэсым къэхъугъэм ащ фэдэ Iизын зэриIэр пилотым риIуагъ ыкIи чъэпыогъум и 30-м зыщыдэбыбэенхэу щыт площадкэм екIолIагъ.
Дельтапланыр лъагэу зыдэбыбэе нэуж аппаратым ытамэ къыгокIыкIыгъ, ащ къыхэкIэу ар къефэхыгъ. Пилотыр ыкIи ащ дисыгъэ бзылъфыгъэм шъобжэу атещагъэхэм къахэкIэу а чIыпIэм ядунай щахъожьыгъ.
Краснодар следственнэ отделым транспортымкIэ иследовательхэм мы хъугъэ-шIагъэр зыщыхъугъэ чIыпIэр къаплъыхьагъ, цIыфэу ар зылъэгъугъэхэм адэгущыIагъэх, транспортым пылъ техническэ тхьапэхэр ауплъэкIугъэх.
Мы уахътэм ехъулIэу зэрагъэунэфыгъэмкIэ, ыпкIэ зыхэлъ фэIо-фашIэхэр ыгъэцэкIэнхэу ыкIи къэзыбыбыхьэрэ аппаратыр ыгъэIорышIэным ифитыныгъэ хъулъфыгъэм иIагъэхэп.
УФ-м и Следственнэ комитет транспортымкIэ и Темыр шъолъыр следственнэ гъэIорышIапIэ и Следственнэ къулыкъу мы хъугъэ-шIагъэм лъапсэу фэхъугъэм изэхэфын лъегъэкIуатэ. Джащ фэдэу Къыблэ транспортнэ прокуратурэм иунашъокIэ Шытхьалэ транспортнэ прокуратурэм мы хъугъэ-шIагъэм ылъэныкъокIэ щынэгъончъэным епхыгъэ хэбзэгъэуцугъэр зэрагъэцакIэрэр еуплъэкIу.
КIАРЭ Фатим.