Я III-рэ Урысые-Узбек гъэсэныгъэ форумэу чъэпыогъум и 26 — 27-м Самарканд къэралыгъо университетым щыкIуагъэм шIэныгъэ-гъэсэныгъэ организациехэм, шIэныгъэ-технологическэ бизнесым, ведомствэ ыкIи министерствэхэм ялIыкIо ыкIи япэщэ 300 фэдиз хэлэжьагъ.
Апшъэрэ еджапIэхэм ясообществэхэр зэдэлэжьэнхэм, гъэсэныгъэм ипроект ыкIи ипрограммэхэр зэгъусэхэу зэхагъэуцонхэм ар фэIорышIэ.
Адыгэ къэралыгъо университетым иректорэу Мамый Даутэ Iофтхьабзэм рагъэблэгъагъ. «Инновационные проекты междисциплинарной направленности в АГУ» зыфиIорэ лъэныкъом, джащ фэдэу «Приоритет 2030» зыфиIорэ программэм къыдыхэлъытагъэу апшъэрэ еджапIэм щызэхащэрэ проектхэм, сэнаущыгъэ зыхэлъ кIэлэцIыкIухэм якъыхэгъэщынкIэ, ахэм IэпыIэгъу афэхъугъэнымкIэ Iофыгъоу зэшIуахыхэрэм ар къатегущыIагъ. АКъУ-мрэ Узбекистан иапшъэрэ еджапIэхэмрэ зэрэзэдэлажьэхэрэм ректорыр къыщыуцугъ.
Адыгэ къэралыгъо университетымрэ Узбекистан иапшъэрэ еджапIэхэмрэ зэрэзэдэлэжьэщтхэм Меморандумым зэдыкIэтхагъэх. ДжырэкIэ АКъУ-м Узбекистан щыщ студент 400 щеджэ.
Апшъэрэ гъэсэныгъэм имызакъоу кIэлэеджакIохэм гъэсэныгъэ тедзэ арагъэгъотыным лъэныкъохэр пылъых.
ДжырэкIэ Кавказ хьисап олимпиадэм ыкIи Гъэмэфэ хьисап еджапIэм Узбекистан икIэлэеджакIохэр чанэу ахэлажьэх.