«ФАНК» зыфиIорэ шIэныгъэ кином фэгъэхьыгъэ фестивалым ишъолъыр площадкэ хъугъэ Адыгэ къэралыгъо университетыр.
Ащ къыдыхэлъытагъэу мы апшъэрэ еджапIэм иконцертнэ зал ыпкIэ хэмылъэу киноленти 6 къыщагъэлъэгъощт, нэужым еплъыгъэхэмрэ экспертхэмрэ темэу къыщаIэтыгъэм тегущыIэщтых.
Документальнэ фильмэу «Будущее за нами?» зыфиIоу урыс режиссерэу Юлия Быба ыгъэуцугъэмкIэ фестивалыр къызэIуихыгъ. Технологическэ компаниехэм цIыфхэр зэрагъэIорышIэхэрэм, искусственнэ интеллектым шIуагъэ е зэрар къехьымэ тегущыIагъэх, джащ фэдэу тищыIэныгъэ тэ тIэкIэлъмэ, неущ къытэхъулIэн ылъэкIыщтым, лъэныкъо зэфэшъхьафхэмкIэ урысые наукэм хэхъоныгъэу ыкIи амалэу иIэхэм ар афэгъэхьыгъ.
Адыгэ къэралыгъо университетым иэкспертхэм, кIэлэегъаджэхэм ыкIи ащ еплъыгъэхэм зэфэхьысыжьхэр ашIыгъэх, яшIошIхэр къыраIотыкIыгъ.
ШэкIогъум и 1-м «Ковчег» зыфиIоу Станислав Ставиновым ыгъэуцугъэр къагъэлъэгъощт. Кавказ биосфернэ заповедникым, чIыопсым ар афэгъэхьыгъ.
— Бэмэ ашIэрэп ТыгъэкъохьэпIэ Кавказыр анахь мэзыбэ зэрытхэм ыкIи осыбэ къызыщесхэрэм зэращыщыр. Джащ фэд, анахь домбай иныр мыщ ис. Фильмэм уеплъымэ, домбаим, шъыхьэм, мышъэм ыкIи нэмыкI хьэкIэ-къуакIэхэм илъэсым ящыIакIэ, цIыфэу ахэр къэзыухъумэхэрэм ыкIи зэзыгъашIэхэрэм афэгъэхьыгъэу бэ узыщыгъозэщтыр, — къыщеIо мы IофшIагъэм ипэублэ гущыIэ.
Сыхьатыр 2-рэ такъикъ 35-м къэгъэлъэгъоныр рагъэжьэщт, ащ ыуж еплъыгъэхэм азыфагу зэнэкъокъу щызэхащэщт, текIоныгъэ къыдэзыхыгъэхэм АКъУ-м ишIухьафтынхэр афагъэшъошэщтых.