КIэлэеджакIохэм апае зэхащэгъэ федеральнэ программэу «Билет в будущее» зыфиIорэм иоператорэу гуманитар проектхэм я Фонд бэмышIэу веб-сериал ыгъэуцугъ. Сэнэхьатхэм якъыхэхын ар фэгъэхьыгъ.
Iоныгъом и 28-м Москва, кинотеатрэу «КАРО Октябрь» зыфиIорэм ар апэрэу къыщагъэлъэгъуагъ ыкIи кIэлэеджэкIо мин 1,5-рэ ащ еплъыгъ. Адыгеим гъэсэныгъэ тедзэ щягъэгъотыгъэнымкIэ республикэ гупчэм апэрэу ащ щеплъыгъэх лицейхэу N 19-м ыкIи 35-м икIэлэегъэджэ-навигаторхэмрэ кIэлэеджакIохэмрэ.
— Обществэм, анахьэу ныбжьыкIэхэм языгъэпсэфыгъо уахътэ сериалхэм яплъынхэр зэрякIасэр къыдэтлъытагъ. СериалкIэ программэм имэхьанэ, ащ фэгъэхьыгъэ къэбархэр ныбжьыкIэхэм алъыдгъэIэсыныр нахь амалышIоу тлъытагъэ, — еIо гуманитар проектхэм я Фонд ипащэу Евгений Есиным.
КIэлэеджакIохэм сэнэхьатым икъыхэхынкIэ IэпыIэгъу афэхъунхэм пае зэрагъэуцугъэр къыдалъытэзэ сериалым хэтхэм аныбжь илъэс 25 — 30-м рагъэхъугъэп.
«Истории наших героев» зыфиIорэм нэбгырэ пэпчъ исэнэхьат къыфэкIонымкIэ гъогоу къыкIугъэр ары къыщыриIотыкIырэр.
Иван Есиным къызэриIорэмкIэ, проектым иавторхэм гъэсэныгъэу ныбжьыкIэхэм зэрагъэгъотын алъэкIыщтхэм ягугъу ашIырэп.
— Нэбгырэ пэпчъ зыщеджэщтыр ежь къыхихын фае. ГущыIэм пае, зыр я 9-рэ классым ыуж колледжым чIэхьанышъ, сэнэхьат зэригъэгъотынэу фай, нэмыкIым апшъэрэ еджапIэм идиплом иIэныр ипшъэрылъ. «Билет в будущее» зыфиIорэм ныбжьыкIэхэр зыщеджэщтхэмкIэ яупчIэ джэуап ритыжьырэп, сэнэхьатэу агукIэ нахь зыфэщагъэр къыхахынымкIэ IэпыIэгъу афэхъуныр ары пшъэрылъ шъхьаIэу иIэр, — еIо ащ.
Лъэпкъ проектэу «Гъэсэныгъэм» къыдыхэлъытэгъэ проектэу «Билет в будущее» зыфиIорэм ишIуагъэкIэ кIэлэеджакIохэм агукIэ зыфэщэгъэ сэнэхьатыр нахь игъэкIотыгъэу зэрагъэшIэн, заушэтын амал яI.
Проектым кIэлэеджакIохэм ямызакъоу, ахэм янэ-ятэхэри хэлэжьэнхэ амал яI. Сайтэу bvbinfo.ru зыфиIорэм зыщыптхын плъэкIыщт.
ДЕЛЭКЪО Анет.