ЩыIэныгъэр озыгъэшIэрэ къэгъэлъэгъон

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэу Евгений Вахтанговым ыцIэ зыхьырэ къэралыгъо академическэ театрэм чъэ­пы­огъум и 11 — 14-м спектаклэхэр Мыекъуапэ къыщи­гъэ­лъэгъуагъэх.

Адыгэ Республикэм и Лъэпкъ театрэу Цэй Ибра­хьимэ ыцIэ зыхьырэр зы­чIэт Унэм спектаклэу «Наш класс» зыфиIорэр чъэпы­огъум и 13-м щыкIуагъ. Польшэм идраматургэу Тадеуш Слободзянек ытхы­гъэм техыгъэ къэгъэлъэгъоныр режиссерэу Наталья Ковалевам ыгъэуцугъ.

Пчыхьэзэхахьэр рамыгъажьэзэ Адыгэ Респуб­ликэм и ЛIышъхьэу КъумпIыл Мурат дунаим щыцIэрыIо театрэу Е. Вах­танговым ыцIэ зыхьырэм идиректорэу, Урысыем ис­кусствэхэмкIэ изаслуженнэ IофышIэшхоу Кирилл Крок IукIагъ. Театрэр Адыгеим къызэрэкIуагъэм фэшI ти ЛIышъхьэ творческэ купым «тхьашъуегъэ­псэу» риIожьыгъ. Адыгеир зызэхащагъэр илъэси 100 зэрэхъугъэм фэгъэхьыгъэ юбилейнэ медалыр Кирилл Крок ритыжьыгъ.

Залым тIысыпIэ нэкI имыIэжьэу спектаклыр зыщырагъэжьэщт уахътэм Адыгэ Республикэм культурэмкIэ иминистрэу Аулъэ Юрэ къыIуагъ дунаим щы­зэлъашIэрэ теат­рэу Е. Вахтанговым ыцIэ зыхьырэр Мыекъуапэ къэ­кIоным ти ЛIышъхьэу Къум­пIыл Мурат кIэщакIо зэрэфэхъугъэр, республи­кэм ихэбзэ къулыкъушIэ­хэр, искусствэр зышIогъэшIэгъонхэр спектаклым еплъынхэу театрэм къызэ­рэкIуагъэхэр.

Адыгеим июбилейнэ медаль зыфагъэшъошэгъэ Кирилл Крок ти ЛIышъхьэ «тхьауегъэпсэу» к­ъы­риIожьыгъ. Къэгъэ­лъэгъоным еплъыщтхэм пчыхьэзэхахьэм гухахъо хагъотэнэу, дэгъоу за­гъэ­псэфынэу, шIоу щыIэр къа­дэхъунэу афиIуагъ.

Пьесэр зы класс къызэ­рыкIом щызэдеджа­гъэ­хэм ящыIэныгъэ къырыкIуа­гъэм ехьылIагъ. ЕджапIэм щырагъажьи зэфыщытыкIэ хэхыгъэхэр зэфыряIэ хъугъэх. Хэгъэгу зэошхор ящы­Iэныгъэ щыпхырыкIыгъ, псэукIэу яIэ хъугъэр лъэ­хъаным щызэфахьысыжьы, непэрэ мафэм гукIэ укъы­фащэ, дунэе политикэм урагъэгупшысэ.

Артистхэу Дарья Щербаковам, Полина Чернышовам, Эльдар Трамовым, Денис Самойловым, Владимир Логвиновым, нэ­мыкIхэм къашIырэ рольхэр щыIэныгъэм къыхэхыгъэх.

Пыйхэм аримыгъашIэу джурт кIэлэцIыкIур гъэбы­лъыгъэкIэ зыпIугъэ бзылъфыгъэр зэрагъэмысэрэр, шъхьэгъуси, кIали зимыIэ бзылъфыгъэм ыгу ихъыкIырэр, зы классым щызэдеджагъэхэм зэгурыIоныгъэ ахэлъэу щыIэныгъэм къащыдэхъу ашIоигъор, нэмыкI гупшысэхэр спектаклым къыщагъэлъагъох.

Къэгъэлъэгъоным еплъы­гъэхэ Мэрэтыкъо Рустем, Кукэнэ Мурат, Ацумыжъ Нурбый, Хьакъуй Аслъан, Тамрико Осадзе, УдыкIэко Ислъам, Жъудэ Аскэрбый, Ольга Гавшинам, Шэуджэн Бэлэ, Ацумыжъ Рустам, нэмыкIхэм гущы­Iэгъу тафэхъугъ. ЩыIэныгъэм ехьылIэгъэ къэгъ­элъэ­гъоным узыIэпещэ. Артистхэм ярольхэр дэгъоу къызэрашIырэм мэхьэнэ ин ратыгъ. Хъугъэ-шIагъэхэр IупкIэу къызэIуахых.

КъумпIыл Мурат къэгъэ­лъэгъоныр къызаухым Е. Вахтанговым ыцIэ зы­хьырэ театрэм ипащэхэм, артистхэм аIукIагъ.

«ЗэлъашIэрэ театрэм спектаклыр къызэригъэ­лъэгъуагъэм Адыгеим икультурнэ щыIакIэ мэхьэнэ ин щыриI. Пьесэр гъэшIэгъонэу гъэпсыгъэ. Пушкинскэ народнэ унэу спектаклыр къызыщагъэлъэгъуагъэр бэмышIэу агъэцэкIэжьыгъ, цIыфхэм якIуапIэу икIэрыкIэу хъу­жьыгъэ. ТIысыпIэ нэкI имыIэжьэу къэгъэлъэгъоныр кIуагъэ, еплъыгъэхэм лъэшэу агу рихьыгъэу сэ­лъытэ», — къыIуагъ Къум­пIыл Мурат.

Евгений Вахтанговым ыцIэ зыхьырэ театрэмрэ Адыгеим ихэбзэ къулыкъу­шIэхэмрэ тапэкIи зэIукIэхэ зэрашIоигъом, культурэм, искусствэм афэгъэхьыгъэу гущыIэгъу зэфэхъугъэх.

Ягупшысэхэр зэдиштэхэу зэхэуцохи нэпэеплъ сурэт­хэр атырахыгъэх.

ЕмтIылъ Нурбый.