Адыгеим ипроектхэм осэ ин къафашIыгъ

Илъэс къэс зэхащэрэ мэкъумэщ къэгъэлъэгъонэу «Дышъэ бжыхь» зыфиIорэр я 24-у Московскэ хэкум блэкIыгъэ тхьамафэм щыкIуагъ. Адыгеир анахь чанэу ащ хэлэжьагъэхэм ащыщ.

АР-м мэкъу-мэщымкIэ и Министерствэ къызэритыгъэмкIэ, республикэм иагропромышленнэ комплекс гъэхъагъэу ышIыгъэхэр Iофтхьабзэм къыщагъэлъэгъуагъэх ыкIи проектэу пхыращыгъэхэм ащыщыбэм осэ ин къафашIыгъ.

«Къоджэ псэупIэхэм хэхъоныгъэхэр ягъэшIыгъэнхэмкIэ практикэ анахь дэгъур» зыфиIорэ лъэныкъомкIэ 2021-рэ илъэсым Красногвардейскэ районым щагъэцэкIэгъэ проектым дышъэ медаль къыхьыгъ.

Селоу Большесидоровскэмрэ къуа­джэу Джамбэчыерэ культурэм и Унэу адэтхэр гъэкIэжьыгъэнхэу, Новосевастопольскэм игурыт еджапIэ кIэлэцIыкIу IыгъыпIэ къыпышIыхьэгъэнэу, къуаджэу Адэмые иурамхэу Шоссейнэм, Школьнэм, Мира зыфиIорэм псым икIуапIэхэр ащызэблэхъугъэнхэу ащ къыщыдэлъытэгъагъ. ЗэкIэри шапхъэхэм ади­штэу гъэцэкIагъэ хъугъэ.

Мы лъэныкъо дэдэмкIэ джэрз медаль къыхьыгъ 2020-рэ илъэ­сым Красногвардейскэ районым­кIэ къуаджэхэу Улапэ, Хьати­къуае, селохэу Белэм, Еленовскэм, Верхненазаровскэм ащапхыращыгъэ проектым. Ащ къы­зэрэщыдэлъытэгъагъэм те­тэу, Улапэрэ селоу Белэмрэ культурэм иунэхэр ащашIыгъэх, Хьатикъуае псырыкIуапIэхэр щызэблахъугъэх, селоу Верхненазаровскэм гъэстыныпхъэ шхъуантIэм икIуапIэхэр щагъэ­псыгъэх, селоу Еленовскэми гъэстыныпхъэ шхъуантIэр ща­тIупщыгъ, ФАП-у дэтым автомашинэ фащэфыгъ.

«КIэлэцIыкIу джэгупIэхэм ягъэпсынкIэ проект анахь дэ­гъур» зыфиIорэ лъэныкъомкIэ Адыгеим ипроектэу 2021-рэ илъэсым Тэхъутэмыкъое районым щыпхыращыгъэм дышъэ медаль къыфагъэшъошагъ. Ащ къызэрэщыдэлъытагъэу, къуа­джэу Щынджые спортым щыпылъынхэу площадкэ ыкIи кIэлэцIыкIу джэгупIэ щашIыгъэх.

Мы номинацие дэдэмкIэ Кощхьэблэ районым 2020-рэ илъэ­сым щагъэцэкIэгъэ проектым УФ-м мэкъу-мэщымкIэ и Министерствэ ирэзэныгъэ тхылъ къыщи­хьыгъ. Ащ къызэрэщыдэлъытагъэу, скейт-площадкэ къуаджэу Кощхьаблэ щагъэ­псыгъ.

«Лучший проект по сохранению и восстановлению ландшафтов и историко-культурных памятников» зыфиIорэ лъэныкъомкIэ поселкэу Майскэм блэкIыгъэ илъэсым щыпхыращыгъэ проектми рэзэныгъэ тхылъ къыфагъэшъошагъ. Ащ къызэрэщыдэлъы­тагъэу, Хэ­гъэгу зэошхом хэ­кIодагъэхэм ясаугъэтэу ащ дэтыр зэтырагъэпсыхьажьыгъ.

Адыгеим имэкъумэщ хъыз­мэтшIапIэхэм ащыщхэри къэгъэлъэгъоным къыщыхагъэщыгъэх. «Былымхъуным гъэхъагъэхэр щызышIыгъэхэр» зыфиIорэ номинациемкIэ дышъэ медальрэ Дипломрэ къыфагъэ­шъошагъ къэбэртэе шы лъэпкъ­хэм апылъ хъызмэтшIапIэу «Джэнэт» зыфиIорэм. Ар Мыекъопэ районым щэлажьэ.

«Эффектный проект грантополучателя» зыфиIорэ номинациемкIэ дышъэ медаль къыхьыгъ ХъорэлI Юрэ иунэе хъызмэтшIапIэу 2020-рэ илъэ­сым грантэу сомэ миллион 22,9-рэ къызэратыгъэм. Ар былымхъуным пылъхэм ащыщ. Ахъщэу къыратыгъэмкIэ щэ бэу къэзыхьырэ чэм лъэпкъхэр, техникэу ыкIи оборудованиеу ищыкIагъэр къыщэфыгъэх. 2021-рэ илъэсым былымышъхьэу ыIыгъэр 492-м нигъэсыгъ, щэ тонн минрэ 500-рэ къакIихыгъ.

«Ежевикэм икъэгъэкIынкIэ хэхъоныгъэхэр зышIыгъэхэр» зыфиIорэ номинациемкIэ тыжьын медаль къыхьыгъ Еутых Руслъан иунэе хъызмэтшIапIэу 2019-рэ илъэсым сомэ миллионрэ мин 500-рэ грантэу къызэратыгъэм. АхъщэмкIэ ащ ежевикэ кошэ 4800-рэ къыщэфыгъ, псы зэракIигъэхъощт системэр, нэмыкIэу ищыкIагъэхэр ыгъэпсыгъэх.

«Цумпэм икъэгъэкIынкIэ гъэхъагъэ­хэр зышIыгъэхэр» зыфиIорэ лъэныкъом­кIэ джэрз медаль къыратыгъ Инна Савосько иунэе хъызмэтшIапIэ. 2017-рэ илъэсым ащ грантэу сомэ миллионрэ мин 500-рэ къыратыгъ. АщкIэ гектаритIу зэлъаубытэу фэбэпIэ 80 ыгъэуцугъ.

Джащ фэдэу Джэджэ районым щылажьэрэ ООО-у «Луч» зыфиIорэм иагрономэу Андрей Толстуновым «УФ-м имэкъумэщ хъызмэт изаслуженнэ IофышI» зыфиIорэ цIэр къыфагъэшъошагъэу, ар къэзыушыхьатырэ тхылъымрэ бгъэхалъхьэмрэ мы Iофтхьабзэм къыщыратыжьыгъэх.

ХЪУТ Нэфсэт.