Адыгэ Республикэм и Къэралыгъо Совет — Хасэм тыгъуасэ зичэзыу я XV-рэ зэхэсыгъо иIагъ.
Ащ хэлэжьагъэх АР-м и Къэралыгъо упчIэжьэгъоу ТхьакIущынэ Аслъан, федеральнэ инспектор шъхьаIэу Сергей Дрокиныр, министрэхэм я Кабинет хэтхэр, федеральнэ ыкIи республикэ хэ-бзэ къулыкъухэм япащэхэр, чIыпIэ зыгъэIорышIэжьын къулыкъухэм ялIыкIохэр, нэмыкIхэри. Iофтхьабзэр зэрищагъ Адыгеим и Парламент и Тхьаматэу Владимир Нарожнэм.
Зэхэсыгъом иповесткэ итыгъэ Iофыгъо 17-мкIэ парламентариехэм унэшъо гъэнэфагъэхэр аштагъэх. Джащ фэдэу 2022-рэ илъэсым иапэрэ мэзих шъолъыр бюджетыр гъэцэкIагъэ зэрэхъугъэм изэфэхьысыжьхэр ашIыгъэх. АР-м финансхэмкIэ иминистрэу Виктор Орловым къызэриIуагъэмкIэ, хахъохэр — сомэ миллиард 16,9-рэ е гухэлъэу щыIэм ипроцент 54,2-рэ, хъарджхэр — сомэ миллиард 16,2-рэ е планым ипроцент 43,9-рэ мэхъу. Профицитыр сомэ миллион 681,2-рэ.
2022-рэ илъэсым ыкIи ащ къыкIэлъыкIощт 2023 — 2024-рэ илъэсхэм ателъытэгъэ республикэ бюджетым зэхъокIыныгъэхэр фэшIыгъэнхэмкIэ АР-м иминистрэхэм я Кабинет предложениеу къыхьыгъэхэм депутатхэм дырагъэштагъ. Шъолъырым хахъоу иIэщтыр сомэ миллиардрэ миллиони 115,1-кIэ нахьыбэ зэрэхъущтым ар епхыгъ.
Повесткэм итыгъэ Iофыгъохэм къадыхэлъытагъэу законопроектхэу «Къолъхьэ тын-Iыхыным пэшIуекIогъэныр», «Физическэ культурэм ыкIи спортым фэгъэхьыгъ», «Адыгеим гъэсэныгъэр зэрэщызэхэщагъэр» зыфиIохэрэм, нэмыкIхэми ахэплъагъэх, ятIонэрэ еджэгъумкIэ аштагъэх.