ЯкъэкIощт уахътэ къыхахыгъ

Донецкэ ыкIи Луганскэ народнэ республикэхэр, Запорожскэ ыкIи Херсонскэ хэкухэр Урысые Федерацием къы­хэ­гъэхьажьыгъэнхэмкIэ референдумыр аухыгъ.

ПэшIорыгъэшъ пчъагъэхэмкIэ, яшъолъыр тикъэралыгъо къыхахьэмэ ашIоигъоу ДНР-м щыпсэухэрэм япроцент 99,23-мэ, ЛНР-м — япроцент 98,42-мэ, Запорожскэ хэкум япроцент 93,11-мэ, Херсонскэ хэкум —исхэм япроцент 87,05-мэ амакъэ атыгъ.

Тикъэралыгъо шъхьэегъэзыпIэкIэ къыхэзыхыгъагъэмэ апае Урысыем мэкъэтынымкIэ чIыпIэ 600 щагъэпсыгъагъ, АдыгеимкIэ — тIу.

Мэкъэтыным дунэе лъыплъакIохэри хэлэжьагъэх. Ахэм къызэратыгъэмкIэ, референдумыр шъыпкъагъэ хэлъэу, зэIухыгъэу кIуагъэ.

«Бэдэдэ къызэрекIолIагъэм ыкIи анахьыбэмэ тикъэралыгъо къыхэхьанхэм зэрэдырагъэштагъэм къегъэлъагъо мы шъолъырхэм ащыпсэухэрэм якъэкIощт уахътэ зыщалъэ­гъурэр Урысые закъор арэу зэрэщытыр!

Мыр тарихъ хъугъэ-шIэгъэ шъыпкъэу Донбасс мамырныгъэ щыIакIэм игъэпсын зэрэфаблэрэр къизыгъэлъэгъукIэу, тэ ти­къэралыгъуи ицIыфхэр, изыкIыныгъэ, исуверенитет, илъэпкъ ифедэхэр къыухъумэн­хэм зэрэфэхьазырыр зэрэдунаеу языгъэлъэгъоу хъугъэ. Урысыем и Президентэу Владимир Путиным мы IофыгъохэмкIэ иеплъыкIэхэр къыгъэнэфагъэх ыкIи къэралыгъом ипащэ къыхихыгъэ лъэныкъом, обществэм ыкIочIэшIухэм тырягъусэу, детэгъаштэ!» — къыIуагъ Адыгеим и ЛIышъхьэу КъумпIыл Мурат.