Экспортер анахь дэгъур

Урысые зэнэкъокъоу «Илъэсым иэкспортер» зыфиIорэм хэлажьэ­хэ­рэр компание инхэр, бизнес цIыкIумрэ гурытымрэ ахэхьэрэ ком­па­ние­хэр, унэе хъызмэт зэхэзыщагъэу лажьэхэрэр ары.

Урысые Федерацием и Къыблэ федеральнэ шъолъыркIэ зэнэкъокъум текIоныгъэ къыщыдэзыхын зылъэкIыщт компаниер шъолъыр комиссием къыгъэнэфагъ. Экспертхэм къызэраIуагъэмкIэ, номинациеу «Экспортер года в сфере готовой продукции АПК» зыфиIорэмкIэ ящэнэрэ чIыпIэр зыхьыгъэр Адыгеим ит консервышI ком­бинатыр ары.

Адыгеим экспорт IэпыIэ­гъумкIэ и Гупчэ ипащэу Дыдыхъу Алый къызэриIуагъэмкIэ, зэнэкъокъум иапэрэ чэзыу шъолъырхэм ащырагъэ­кIокIы. Илъэсым къыкIоцI продукциеу къыдагъэкIырэм хэ­хъоныгъэхэр фэзышIыгъэхэр ары зэнэкъокъум иапэрэ чэзыу хэлажьэхэрэр.

Экспертнэ комиссием экспортерхэм гъэхъагъэу яIэхэм ялъытыгъэу апэрэ чIыпIэхэр компаниехэм, организациехэм, предпринимательхэм къафагъэ­шъуашэх. Ахэм ащыщэу анахь экспортер чанхэр зэнэкъокъум иятIонэрэ чэзыу хагъэлажьэх, зэрэхэгъэгоу анахь экспортер дэгъухэр ащ къыщыхахыщтых.

Урысые зэнэкъокъум ащытекIуагъэхэм шIухьафтынхэр Дунэе эксперт форумэу «Сделано в России» зыфиIорэм къащыратыжьыщтых, Прави­тельствэм хэтхэри Iофтхьабзэм хэлэжьэщтых.