Адыгэ Республикэм и Къэралыгъо филармоние тыгъуасэ щыкIогъэ Iофтхьабзэр зыфэгъэхьыгъагъэр Урысыем и Къэралыгъо санитарнэ-эпидемиологическэ къулыкъу зызэхащагъэр илъэси 100 зэрэхъурэр ары.
Iофтхьабзэм хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднер, Адыгэ Республикэм иминистрэхэм я Кабинет хэтхэр, федеральнэ, республикэ къулыкъухэмрэ ведомствэхэмрэ яIэшъхьэтетхэр, санэпиднадзорым иIофышIэхэр ыкIи иветеранхэр.
Адыгеим и ЛIышъхьэу КъумпIыл Мурат ыцIэкIэ ГъэIорышIапIэм иIофышIэхэм къафэгушIуагъ Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец. Ащ къызэрэхигъэщыгъэмкIэ, цIыфхэм япсауныгъэ къэухъумэгъэным ыкIи санитарнэ-эпидемиологие лъэныкъомкIэ яIофхэм язытет тэрэзыным яIахь гъэнэфагъэ хашIыхьэ къулыкъум щылажьэхэрэм.
«Илъэси 100-м къыкIоцI къэралыгъо пшъэрылъышхуабэ шъуикъулыкъу зэшIуихыгъ: эпидемиехэм апэуцужьыгъэнымкIэ, заохэмрэ чIыпIэ Iэшэ зэпэуцужьыныгъэхэмрэ якIэуххэр дэгъэзыжьыгъэнхэмкIэ, цIыфхэм псэунхэмкIэ, Iоф ашIэнымкIэ ыкIи загъэпсэфынымкIэ амал тэрэзхэр ягъэгъотыгъэнхэмкIэ», — къыIуагъ Владимир Свеженец.
Урысыем и Президентэу Владимир Путиным коронавируснэ инфекцием пэшIуекIорэ бэнэныгъэмкIэ Роспотребнадзорым мэхьанэу иIэм осэшхоу къыфишIыгъэм фэгъэхьыгъэу хэушъхьафыкIыгъэу ащ къыIуагъ, хэгъэгум щыпсэурэ цIыфхэм ящыIакIэ щынэгъончъэу щытынымкIэ къулыкъум щылажьэхэрэм къатефэрэр зэрашIэрэр къыхигъэщыгъ.
Республикэм щыпсэухэрэм япсауныгъэ икъэухъумэн зиIахьышхо хэзышIыхьэгъэ ветеранхэм, непи а къулыкъум щылажьэхэрэм Адыгэ Республикэм и ЛIышъхьэ инэу зэрафэразэр В. Свеженец къыIуагъ.
МэфэкI зэIукIэм къыщыгущыIагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднер.
ГъэIорышIапIэм иIофышIэхэм ащыщхэр Адыгэ Республикэм и ЛIышъхьэ ирэзэныгъэ тхылъхэмкIэ хагъэунэфыкIыгъэх, бгъэхэлъхьэ тамыгъэу «Роспотребнадзорым иIофышIэ гъэшIуагъ», нэпэеплъ медальхэу «Урысыем и Къэралыгъо санэпидкъулыкъу илъэси 100 мэхъу» зыфиIохэрэр, Урысыем и Роспотребнадзор ищытхъу тхылъхэр ыкIи Урысыем и Роспотребнадзор ипащэ ирэзэныгъэ тхылъхэр аратыжьыгъэх.
АР-м и ЛIышъхьэ ипресс-къулыкъу