Дзэм кIонэу къызтефэхэрэм ащыщхэр дэщыгъэнхэм къыхиубытэхэрэм ыкIи ахэм яунагъохэм IэпыIэгъоу арагъэгъотыщтым фэгъэхьыгъэу зэшIуахын фаехэм ягугъу къыщишIыгъ вице-премьерхэр зыхэлэжьэгъэхэ зэхэсыгъоу УФ-м и Правительствэ и Тхьаматэу Михаил Мишустиным зэхищэгъагъэм.
УФ-м и Правительствэ иунашъоу IофшIэнымкIэ зэзэгъыныгъэхэр къызэтегъэуцогъэнхэм фэгъэхьыгъэм кIэтхагъэх ыкIи УФ-м и Къэралыгъо Думэ ыштагъ. «IофшIакIом ичIыпIэ къыфэнэжьыщт ыкIи къулыкъум ащагъэр къызикIыжьыкIэ, зыIукIыгъэгъэ лэжьапIэм къыгъэзэжьын ылъэкIыщт. НэмыкI шIыкIэхэу IэпыIэгъу зэрядгъэкIыщтхэри тэухэсых», — къыIуагъ УФ-м и Премьер-министрэ. Ащ игуадзэу Татьяна Голиковам къызэрэхигъэщыгъэмкIэ, мы унашъоу IофшIакIохэмрэ къэралыгъо къулыкъушIэхэмрэ афэгъэхьыгъэм Iоныгъом и 21-м къыщыублагъэу кIуачIэ иIэ хъугъэ. Мобилизацием къызэрэхиубытагъэмкIэ тхылъыр IофшIэн язытырэм зыригъэлъэгъу нэуж IофшIэнымкIэ зэзэгъыныгъэр къызэрэзэтырагъэуцорэмкIэ унашъор агъэхьазырын фае ыкIи IофшIакIоу IукIырэм тын пстэури IэкIагъэхьажьынэу щыт. IукIырэм ычIыпIэ охътэ гъэнэфагъэкIэ итынэу IофшIэн зэзэгъыныгъэкIэ нэмыкI цIыф аштэн алъэкIыщт.
Правительствэмрэ Къэралыгъо Думэм идепутатхэмрэ IофшIэнымкIэ кодексым, УФ-м икъэралыгъо ыкIи игражданскэ къулыкъу ехьылIэгъэ хэбзэгъэуцугъэхэм, страховой пенсиехэм, социальнэ ыкIи пенсие ухъумэным афэгъэхьыгъэхэм гъэтэрэзыжьынхэр афашIынхэм фагъэхьазырыгъэх.
«Дзэм ащэщтхэ IофышIэхэм яунагъохэм зыныбжь илъэс 14-м нэмысыгъэ кIэлэцIыкIухэр яIэхэ хъумэ, шэсхэр (гарантиехэр) афагъэуцущтых. Ахэм яшIоигъоныгъэ хэмылъэу уахътэу IофшIэным фыхэхыгъэм къелыекIэу агъэлэжьэнхэ фитыщтхэп, чэщырэ, зыгъэпсэфыгъо ыкIи мэфэкI мафэхэм IофышIэ къыдащыхэ хъущтхэп, командировкэ агъэкIонхэу щытыщтхэп. IофшIакIохэм япчъагъэ агъэкIэкIы зыхъукIэ, ахэм янэсынхэ фитыщтхэп», — къыIуагъ вице-премьерым.
Джащ фэдэу, Урысыем икIыжьыгъэ предприятиехэм ащылажьэщтыгъэхэм, IуагъэкIыным ищынагъо зиIэхэм фэгъэкIотэнэу афашIыхэрэр къихьащт илъэсым ыкIэ нэс лъагъэкIотагъэх.
Дзэм кIонэу къызтефэхэрэм ащыщхэр дэщыгъэнхэм къыхиубытагъэхэм дзэ къулыкъушIэхэм ястатус яIэщт ыкIи контракт шIыкIэкIэ къулыкъу зыхьыхэрэм ягарантиехэр ахэми ателъытэгъэщтых — къулыкъу зэрахьыщт уахътэр пенсием истраховой Iахь икъэлъытэн хагъэхьащт, джащ фэдэу нахьыжьэу пенсием кIонхэ фитыныгъэ яIэщт.
Адыгеими IэпыIэгъу аритыщт
Мобилизацием къыхиубытэу дзэм кIорэ пэпчъ сомэ мини 100 ратынэу Адыгеим унашъо щашIыгъ.
«Мобилизацием къыхиубытэхэрэм республикэ бюджетым щыщэу зэтыгъоу сомэ мини 100 IэпыIэгъоу яттынэу унашъо тшIыгъэ. Адыгеим, Уры-сыем инэмыкI шъолъырхэм афэдэу, ищыкIэгъэ фэIо-фашIэхэр щызэрахьэх. Дзэм кIонэу къызтефэхэрэм ащыщхэр дэщыгъэнхэм къыхиубытэхэрэм къяджэщт комиссием республикэм Iоф щешIэ. Ащ сэ сшъхьэкIэ пэщэныгъэ дызесэхьэ. Зэхэсыгъо пчъагъэ тиIэгъах, ахэм пшъэрылъ шъхьаIэхэр зэшIозыхын фаехэм ащыфэзгъэуцугъэх. Верховнэ главнокомандующэм иунашъохэр зэкIэ уахътэу афэгъэнэфагъэм къыриубытэу зэшIотхыщтых», — къыIуагъ КъумпIыл Мурат.
Мобилизацием къыхиубытэхэрэм анэмыкIэу ахъщэ тыныр афатIупщыщт Адыгеим щыпсэухэу Андырхъое Хъусен ыцIэ зыхьырэ Мыекъопэ артиллерийскэ дивизионым дзэ къулыкъу щахьынэу УФ-м зыкъэухъумэжьынымкIэ и Министерствэ контракт дэзышIыгъэхэми.
Шъугъу къэдгъэкIыжьын, резервым щыIэ нэбгырэ мин 300 фэдиз УрысыемкIэ мобилизацием къыхиубытэщтыр, дзэм ащэщтхэр ыпэкIэ къулыкъу зыхьыгъэхэу зэмызэгъыныгъэ зэфэшъхьафхэм ядэгъэзыжьын хэлэжьагъэхэр ыкIи дзэ-учетнэ сэнэхьат зиIэхэр арых.