Шъолъырым игъэIорышIэнкIэ Гупчэу Адыгеим щыIэм къызэритыгъэмкIэ, зыныбжь хэкIотагъэхэр охътэ гъэнэфагъэкIэ зыщаIыгъынхэ ыкIи зыщалъыплъэнхэ алъэкIыщт чIыпIэхэр республикэм иIэмэ цIыфыбэ къыкIэупчIэ.
«Шъуимафэ шIу! Сятэ уз хьылъэ (деменцие) иI. Тхьамэфищым къыкIоцI нэмыкI къалэм тыщыIэн фае. КъыташъуIоба, ар охътэ гъэнэфагъэкIэ зэтщэлIэн ыкIи зыщылъыплъэнхэ чIыпIэ Адыгеим ита?», – республикэм ипащэхэм мыщ фэдэ упчIэкIэ закъыфигъэзагъ Маргарита Медведевам.
Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ къызэрэщаIуагъэмкIэ, проектэу «Передышка» зыфиIорэм ишIуагъэкIэ зыныбжь хэкIотэгъэ цIыфхэр, земыкIошъухэрэр охътэ гъэнэфагъэкIэ республикэм ит унэ-интернатхэм ащаIыгъых.
— Зыгъэпсэфыгъо уахътэ цIыф пэпчъ ищыкIагъ. Анахьэу илъэс пчъагъэ хъугъэу уз хьылъэ зиIэхэм апэсхэм, зыIыгъхэм. Зыныбжь хэкIотагъэхэм яфэIо-фашIэхэр зэпымыоу зыгъэцэкIэрэ цIыфхэм мы проектым ишIуагъэ арегъэкIы. ГущыIэм пае, шъугу зыфэузырэ Iахьылыр, благъэр республикэ унэ-интернатым къэшъущэн шъулъэкIыщт. Ащ зисэнэхьат хэшIыкIышхо фызиIэ специалистхэр лъыплъэщтых, сыд фэдэрэ лъэныкъокIи IэпыIэгъу фэхъущтых. Проектэу «Передышка» зыфиIорэр загъэцакIэрэм къыщыублагъэу ащ амалэу къытырэр унэгъуи 7-мэ къызфагъэфедагъ, — къыIуагъ Адыгеим IофшIэнымкIэ ыкIи социальнэ хэхъоныгъэмкIэ и Министерствэ иотдел ипащэу ЦIыпIынэ Жанетэ.
Лъэпкъ проектэу «Демографием» къыдыхэлъытагъэу республикэ унэ-интернатым иотделениеу «Активное долголетие» зыфиIорэм ишIын рагъэжьагъ, ащ чIыпIэ 250-рэ иIэщт.
— 2024-рэ илъэсым псэуалъэр къызэIутхыщт. Ащ ишIуагъэкIэ унэ-интернатым ыштэн ылъэкIыщт цIыфхэм япчъагъэ хэпшIыкIэу хэхъощт. Зыныбжь хэкIотагъэхэм загъэпсэфынымкIэ ыкIи япсауныгъэ агъэпытэнымкIэ амалышIухэр аIэкIэлъ зэрэхъущтым дакIоу ежьхэм шIоигъоныгъэу яIэм елъытыгъэу кружок зэфэшъхьафхэр афызэхащэщтых, — къыIуагъ АР-м IофшIэнымкIэ ыкIи социальнэ хэхъоныгъэмкIэ и Министерствэ испециалистэу Светлана Токаревам.
ЫпшъэкIэ зигугъу къэтшIыгъэ псэолъакIэр аужырэ шапхъэхэм адиштэу зэтырагъэпсыхьащт, актовэ ыкIи спорт залхэр, нэмыкIхэр хэтыщтых, оборудованиякIэ чIагъэуцощт.
— Зыныбжь хэкIотагъэхэм IэпыIэгъу афэхъугъэныр къэралыгъом ипшъэрылъ шъхьаIэхэм ащыщ. Ащ дакIоу тынаIэ зэратетыр тинахьыжъхэм зэхашIыкIыным мэхьанэшхо иI. Ащ фытегъэпсыхьэгъэ шIыкIэ зэфэшъхьафхэр республикэм щытэгъэфедэх, тапэкIи а IофшIэныр лъыдгъэкIотэщт, — къыхигъэщыгъ ыпэкIэ Адыгеим и ЛIышъхьэу КъумпIыл Мурат.