Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн къыдыхэлъытагъэу Адыгэ Республикэм и Джэджэ район пхырыкIырэ гъогухэм ащыщхэр агъэцэкIэжьыгъэх.
Ахэм ащыщ автомобиль гъогоу «Гончарка – Черемушкин — Келермесская» зыфиIорэм изы Iахьэу километри 5 фэдиз хъурэр. Ар республикэм дэгъоу щызэлъашIэрэ зекIо гъогоу поселкэу Гончаркэм дэт Дендрологическэ паркым екIуалIэрэр ары.
Зигугъу къэтшIыгъэ паркым чъыг лъэпкъ 350-рэ фэдиз къыщэкIы, тишъолъыркIэ ар коллекцие анахь ин. Мы чIыпIэм зыщызгъэпсэфынэу къэкIорэ хьакIэхэм япчъагъэ илъэс къэс нахьыбэ мэхъу, ащ къыхэкIыкIэ гъогум изэтегъэпсыхьан мэхьанэшхо зэриIэм щэч хэлъэп.
Гъогу Iахьым изытет шапхъэхэм адиштэщтыгъэп. Ар Адыгеяавтодорым къыдилъыти гъэцэкIэжьынхэр зэрашIылIэщтхэм ахагъэхьагъ.
Зэзэгъыныгъэу щыIэм диштэу, сомэ миллион 61,5-рэ зытефэрэ проектыр зыгъэцэкIагъэр Iахьзэхэлъ обществэу «Шэуджэн ДРСУ-р» ары. IофшIэнхэм къадыхэлъытагъэу гъогур пэшIорыгъэшъэу агъэкъэбзагъ, зэщыз ашIыгъ, асфальт тыралъхьагъ, тамыгъакIэхэр щагъэуцугъэх, гъогу Iупэхэр зэтырагъэпсыхьагъэх, нэмыкIэу зэшIуахыгъэр макIэп.
— Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытэгъэ проектыр гъэцэкIагъэ зэрэхъугъэм ишIуагъэкIэ километри 5 фэдиз зикIыхьэгъэ гъогур федеральнэ шапхъэхэм адиштэ хъугъэ. Джы Гончаркэм къэкIорэ хьакIэхэр, зекIохэр Iэрыфэгъоу Дендрологическэ паркым нэсынхэ алъэкIыщт. Ащ дакIоу мы гъогу Iахьыр зэолIэрэ федеральнэ трассэу А-160 «Мыекъуапэ —Кореновск» зыфиIорэми непэ гъэцэкIэжьын инхэр щэкIох. Федеральнэ ыкIи шъолъыр гъогушIхэм яIо зэхэлъэу Iоф зэрэзэдашIэрэр мыщ къегъэлъагъо, — къыIуагъ Адыгеяавтодорым ипащэу Алексей Корешкиным.
Лъэпкъ проектым игъэцэкIэн къыдыхэлъытэгъэ IофшIэнхэр зэрифэшъуашэу зэхэщэгъэнхэм республикэм ипащэхэм анахьэу анаIэ тырагъэты, тигъогухэр щынэгъончъэу щытынхэм а пстэури фэIорышIэ.