Пятилеткэр илъэси 4-кIэ

Жарэкъо Нюсе Исхьакъ ыпхъур гъэтхапэм и 8-м къэхъугъ. Зэрэдунаеу бзылъфыгъэхэм я Мафэ зыщыхагъэунэфыкIырэм ар тефэгъагъ. Янэ-ятэхэр гушIогъагъэх, насыпышIо хъунэу Тхьэм фелъэIугъагъэх. Нюсе бэмэ зэлъашIагъ, ыцIэ чыжьэу Iугъэ.

Ар унэгъо Iужъу зыщапIугъэр. Зэо илъэсхэри, къыкIэлъыкIуагъэхэри цIыкIузэ зэпызычыгъэхэм ащыщ. ХэткIи псынкIагъэп щыIакIэр. Колхозхэр, промышленностыр къэIэтыжьыгъэнхэм хэгъэгур дэлажьэщтыгъ.

Нюсе еджапIэр къызиухыкIэ ветеринар врач хъунэу ары зыфэягъэр. Сэнэхьатыри зэригъэгъотыгъагъ, ау апэ IофшIэныр ригъэжьэгъагъ. Шэуджэн районым ит колхозэу Шэуджэн Мосэ ыцIэ зыхьырэм ибылымэхъо фермэ агъэкIогъагъ. Чэмыщхэм ащыщ IофышIэ къыдэмыкIымэ, ащ ычIыпIэ лажьэщтыгъ. Унэгъо IофхэмкIи янэ дэIэпыIэщтыгъ.

А лъэхъаным чэмхэр IэкIэ ащыщтыгъэу, нэужыр ары аппаратхэр къащэфыхэу зырагъэжьагъэр. Нюсе чэмыщ пэрытхэр зэрэзэнэкъокъухэрэр ылъэгъу­щтыгъ. Колхозхэм, районым, хэкум а­хэм ацIэхэр ащызэхэпхыщтыгъэх. Щэр хэгъэ­гум ищыкIэгъагъ, къалэхэм адэсхэми аIэкIэгъэхьэн фэягъ.

Бэ темышIэу ежьыми былымышъхьэ 25-рэ къыратыгъагъ. Чэмыщ IэпэIасэхэм закъыщыригъэнэнэу фэягъэп, икъарыу хилъхьэзэ Iоф къиныр ыгъэцакIэщтыгъ.

Чэмыщхэр фермэм лъэсэу кIощты­гъэх, зэращэнхэу транспорт колхозхэм яIа­гъэп. Нюси пчэдыжьым жьэу къэтэджыти IофышIэ кIощтыгъэ, чэмхэм ядэфыгъо къэмысызэ ахэр къэпщынхэ фэягъ. Пчыхьэми угужъо хъущтыгъэп, а зы уахътэм къащыхэу есэгъэ былымхэм щэр къамытын ылъэкIыщтыгъ.

Ыныбжь емылъытыгъэу IофшIэнымкIэ чанэу зыкъэзыгъэлъэгъогъэ пшъа­шъэр Коммунистическэ партием исатыр хэтхэм ахагъэхьэгъагъ. 1970-рэ илъэсым ащ чэм пэпчъ щэ литрэ 2532-рэ къыкIихыгъагъ. Илъэсырэ ныкъорэ зытекIым литрэ мини 4,5-м нэсыгъагъ.

Нюсе иIофшIакIэ колхозым ыкIи районым ипащэхэми, зыхэт партиеми уасэ къыфашIыгъагъ, а илъэс дэдэм «Быракъ Плъыжьым» иорден къыфагъэшъошэ­гъагъ. Ащ фэдэ бгъэхалъхьэхэр зэратыщтыгъэхэр хъызмэт зэфэшъхьафхэм ащылажьэхэу иIофшIакIэкIэ гъэхъэгъэшхохэр зиIэхэр арыгъэ.

ЦIыфхэм Нюсе игугъу ашIэу зыра­гъа­жьэм еджапIэм тычIэсыгъ. Комсо­мольцэ чанэу зэрэщытыр, зэмыблэ­жьэу колхозым Iоф зэрэщишIэрэр, партием зэраштагъэр къытфаIуатэщтыгъ.

ЦIэ лъапIэу «Социалистическэ Iоф­шIакIэм и ЛIыхъужъ» зыфиIорэр къызыратым ащ ыныбжь илъэс 30-м ехъугъэ къодыягъ. Джащ фэдэу Нюсе «Пшызэ шъолъыр ибылымэхъо анахь дэгъу» зыфиIорэ щытхъуцIэр, СССР-м и ВДНХ итыжьын медаль, «Коммунистическэ IофшIэным иударник» зыфиIорэ тамыгъэр къыфагъэшъошэгъагъэх. Ударникхэм янахьыбэр хъулъфыгъагъэх. Iофэу ашIэ­рэр къиныгъ, бзылъфыгъэ къарыукIэ зэнэкъокъум шIухьафтын къыщыдэпхыныр зэрэмыпсынкIагъэр хэти къыгурыIощтыгъ. Арэу щытыми, чылэм щапIугъэ адыгэ бзылъфыгъэу иуахъти, икъарыуи хилъхьэзэ Iоф зышIагъэм ыцIэ зэрэкъэ­ралыгъоу щызэлъашIагъ.

Илъэс зэкIэлъыкIохэм зэригъэгъоты шIоигъогъэ сэнэхьатыр Нюсе щыгъупшагъэп, Мыекъопэ мэкъумэщ техникумыр къыухи, ветеринар хъугъэ.

«Социалистическэ IофшIакIэм и ЛIы­хъужъ» зыфиIорэр къызыфаусыгъэхэм ялыягъэу къахэзгъэщырэ къэбарыр Нюсе игъашIэ къыхэнагъ. Пятилеткэм щэу къыхьыжьын фэягъэр илъэсиплIыкIэ ежьым ыгъэцэкIэгъагъ.

Нюсе фэдэу цIэрыIо хъухэрэр нахь цIыфыбэмэ зэрашIэнхэу гъэзетхэм къа­рагъахьэщтыгъэх, чIыпIэ, район народнэ депутатхэм я Советхэм ахагъахьэщтыгъэх. Адыгэ хэкур зыхэтыгъэ Краснодар краим игъэцэкIэкIо комитет илъэсыбэрэ ежьыри хэтыгъ.

Щытхъур къэзылэжьыгъэ Жарэкъо Нюсе илъэс 48-рэ нахь къыгъэшIагъэп. Ау ар цIыфхэм агу къинагъ, ащыгъуп­шэрэп.
Шъаукъо
Аслъангуащ.